KADAATON TINARU KADAZANDUSUN: KOUBASANAN OM KOTUMBAYAAN DI MONGOWIT KORUTUMON? (PETANDA BURUK DALAM MASYARAKAT KADAZANDUSUN: AMALAN DAN KEPERCAYAAN YANG MEMBAWA KEMUNDURAN?) sinuat di: Minah Sintian Fakulti Bahasa dan Komunikasi Universiti Pendidikan Sultan Idris Tanjong Malim, Perak Darul Ridzuan Email:
[email protected] Tel: 011 11838551 Abstrak Tinaru Kadazandusun dounguugulu id pogun Sabah nopo nga ogumu koubasanan om kotumbayaan. Iso nopo koubasanan om kotumbayaan nga kadaaton. Komoyon nopo kadaaton nga tanda di milo manahak korutuman kumaa kohoro-horoon di tulun di au mamantang. Kakadaaton nopo nga mantad do tuni-tuni tongo tayam, songongi, om koligaganan di nowonsi mantad tulun sondii. Ontok haro kadaaton, au obuli i tulun mooi kalaja id dumo, mongindupot, monginsada om mogihum pamaal do lamin id talun. Kalatas kalaja nopo diti nga winonsoi maya ponoriukan mantad id buuk om piumpangalan komolohingan kampung sabaagi do informan. Suai ko iri, aanu nogi o piipiro tonsi kalatas kalaja diti maya pongia’an om pambalajalan id linimput pambalajalan id ponginabasan BDS3023 Susuyan Boros, Koborsuratan om Koubasanan Kadazandusun. Kalatas kalaja diti maan pabantao’ sabaagi popolombus koubasanan om kotumbayaan tinaru tokou di guugulu di kaanu manahak bagas koposion loolobi po id gana sosioekonomi. Alansan daa do milo dodion o kalatas kalaja diti do sabaagi tadon pomusarahan maan ponokodung do papalaab om popoungkalad ponoriukan kokomoi koubasanan om kotumbayaan tinaru tokou kumaa sukod wagu.
1
Abstrak Etnik Kadazandusun tradisional di negeri Sabah mempunyai banyak amalan dan kepercayaan. Salah satunya ialah mempercayai petanda buruk (omen). Petanda buruk memberi masalah kepada orang yang tidak menghiraukannya. Petanda buruk terdiri daripada bunyi-bunyian binatang, serangga dan kemalangan yang menimpa seseorang. Sekiranya terdapat tanda-tanda buruk, seseorang itu tidak boleh pergi ke kebun untuk bekerja, memburu, menangkap ikan dan mengambil kayu-kayan di hutan untuk membuat rumah. Kertas kerja ini dibuat berdasarkan penyelidikan kepustakaan, dan temubual dengan beberapa penduduk kampung. Selain itu, beberapa isi kandungan dalam kertas kerja ini diperolehi daripada perbincangan dalam kelas melalui kursus BDS3023 Sejarah Bahasa, Kesusasteraan dan Kebudayaan Kadazandusun. Kertas kerja ini dibentangkan sebagai cara menjelaskan amalan dan kepercayaan etnik Kadazandusun tradisonal yang memberi kesan dalam kehidupan terutama dalam bidang sosioekonomi. Diharapkan kertas kerja ini menjadi sumber idea dalam membantu mengembang dan melebarkan kajian berkaitan amalan dan kepercayaan masyarakat Kadazandusun dalam diri generasi muda.
2
Kopintutunan Tinaru Kadazandusun Tinaru Kadazandusun nopo nga komuniti pasok momogun di bobos ogumu id pogun Sabah. Tumanud do Opisol Perangkaan Malaysia raan Sabah di toun 2010, pinopolabus do ginumu nopo etnik Kadazandusun nga soginumu 555 647 tulun toi 24.69 % mantad koinsanan tulun warganegara Malaysia i poingion id Sabah (www.statistics.gov.my/portal/images/.../sabah.html). Lobi 32 subetnik Kadazandusun pongion id pototongkop pogun Sabah miagal ko ponong hilo Kota Marudu, Ranau, Tambunan, Kota Belud, Penampang, Putatan, Kinarut, Papar, Inanam, Menggatal, Telipok, Tuaran, Tamparuli, Kudat, Tambunan, Kuala Penyu , Keningau, Telupid om Lahad Datu (Dayu Sansalu, 2007: 67 ; Suraya Sintang, 2007:47). Kogumuan diti tinaru Kadazandusun poingion id tindal nulu-nulu Banjaran Crocker. Kalaja nopo diolo di dounguugulu nga momutanom-tanom do parai tidong, mananom do kinotuan, kowa’an, mundok, kasou, wooi, sigup, losun, luong, guol, ronguol om suusuai po. Haro nogi i mogihum kaakan-akanan maya pongindupotan id talun miagal ko magasu, monopuk, mamalawa, papataan do gado, kasip toi sungul om momulut. Suai ko iri, haro nogi ii mogihum sada id bawang maya mamarambot, momukot, papataan do bubu, magasak om moniud. Aanangan nogi yolo do momogompi tayam miagal ko manuk, wogok, kalabau, sapi, om kambing. Tayam nopo diti, okon nopo ko gunoon sabaagi tadon do kaakan-akanan nga dodion nogi sabaagi polubukon ontok haro ritual miagal ko madsalud, monumbui, madabar, patod, om monowogok nga gunoon nogi sabaagi borian, om pambayar do sogit (Dayu Sansalu, 2007). Oponsol tomod o kogunoon do talun kumaa tinaru Kadazandusun tu’ okon nopo ko pogihuman do taakanon nga adadi nogi do tadon pongonuan do pomonsoi lamin om pongimburuan miagal ko kakamot id lamin, dumo, ponginsadaan om suusuai po. Tinaru Kadazandusun di guugulu nopo nga mamantang kopio do sandad posorili. Agayo tomod o ponongkuyaan diolo do kotumbayaan animisme. Mantad di tanak po, ia’on yolo do kotumbayaan do haro sunduan di gouton, kayu, bawang, rahat, nulu, pampang, tanah, pudsung tanah, palu-palu, om tayam id suang talun. Ia’on nogi yolo do id winoun nopo diti nga haro pongion di tongo sunduan di au okito. Sundun nopo diti haro i osonong om haro nogi i tangaraat. Magandad i tongo sunduan do mamarahung do tulun maya poporikot do toruol-ruol, kadansayon, koromiton om suusuai po. Mantad no diti , mamantang tomod i tinaru tokou do sandad posorili.
3
Soira do mongoi pongukab do tanah maan pomutanamai miagal ko mooi patod, maan po pomurinoitai pogulu tumimpuun (Minah Sintian, 2013).
Kadaaton Tumanud nopo Mongulud Boros Dusun Kadazan (1994:61), boros guas nopo kadaaton nga ‘kadaat’ toi ‘daat’ i kirati bencana (Malayu) , misery (Inggeris). Kadaaton nopo miagal ko iso o tanda toi ko’ alamat di popoundar dati do au sumunsung dii. Poomitanan nopo nga lontugi ii abantalan id tindalanon do mindahu. Ii nopo lontugi nga tanda do kadaaton. Boros kadaaton nopo id Inggeris nga komoyon do omen. Tumanud do buuk Grolier Encyclopedia of Knowledge (1998:91), kadaaton nopo nga kotumbayaan dounguugulu sabaagi poninduai di odadi id timpu dumontol i manahak do rati osonong toi au osonong. Id tinaru suai miagal ko hilo id kotonobon do tadau (Western), haro nogi diolo kotumbayaan kokomoi kakadaaton miagal do pangkis tombolog (ravens, owls), om lahung do tasu i kirati do nasip osonong toi au osonong. Monongkuyaan nogi yolo do haro nopo kinaantakan di okon ko koubasanan miagal ko sontuludtulud tombolog di obitua (sacred birds), mituong o pomogunan (eclipses) om comets , nga ponakatanda potilombus mantad kinorohingan. Mantad pongintangan di Frank Swettenham songulun residen id Perak, Tanah Melayu, tinaru Malayu nogi nga haro kotumbayaan do mongowit tanda au osonong i tombolog do puok sokiro mintulud minsoosodop. Soira kitanda miagal diri, haro kaantakan au osonong miagal ko haro tulun minidu pogun ( Zubaidah Ibrahim, 2003). Tinaru Kadazandusun di guugulu (om haro nogi ii kakal po baino) nopo nga mamantang tomod yolo diti kadaaton. Kadaaton nopo nga haro o nilai di obitua (the sacred) i nodadi lugu kotumbayaan id toisoiso masyarakat. Tumanud di Emile Durkheim (1858-1918) songulun lungkitas sosiologi ii momonsol kopio kogiroton om kawakasan do koposion tulun id toisoiso masyarakat mantad tinaru Perancis, moboros do nilai-nilai nopo di maan piupakati loolobi po i kiula obitua nga kaanu manamong kogiroton om piisaan sosial id toisoiso masyarakat om momuruan do kapana-panaho dinamika toisoiso masyarakat (Mudji Sutrisno & Hendra Putranto, 2005). Au obuli i tongo tulun id kampung diri do sumunsung di nilai-nilai nakatantu id toisoiso masyarakat i nointutunan kiula kolektif. Masyarakat kiula kolektif nopo nga kikoubasanan normatif i kirati do kiwaa undang-undang toi kooturan id bontuk kowoowoyoon norma (norms) (Kementerian Kebudayaan, Kesenian dan Pelancongan Malaysia, 1999). Norma nopo diti nga 4
manahak do kooturan kowoowoyoon di apatut id kaadat-adaton, koontok toi kasala. Natantu o norma diti maya kasagaan (sanctions) miagal ko kowoowoyoon di natantu kosudong, onuan do tutangkap om ukuman montok kowoowoyoon di natantu kasala. Maya teori di Durkheim, okito tokou dati tinaru guugulu di au aanangan do sumunsung nunu-nunu nopo nilai di natantu id masyarakat sabap modosi yolo do otulahan. Nung kotimbaba yolo do kadaaton sundung do id pongindopuan toi maso id tindalanon nga olomus nopo yolo do tumingkod om pogulian id lamin. Kiwaa piipiro kadaaton di pantangon tulun guugulu miagal ko’ kadaat do lontugi id ralan, korongou tuni puok, tuni longkug, tuni nahagan, kokito gonsuri dumarapas do ralan toi korongou monguni “sirisit-sirisit”, korongou lohok do paus, kokito pungit sontulud-tulud pitangaadau, kokito bosing dumarapas do ralan, posis, tompu, toni, kokito tulanut guntomou id ralan om korongou tuni godu mingongir do pitangaadau. Adadi o tayam toi songongi diti sabaagi kadaaton nung haro no koyuuyuo di okon ko koubasanan. Sabaagi tinaru di mogihum kaakan-akanan om pongindopuan maya pomutanaman, insaru yolo kotimbaba do kadaaton. Dasom id tindalanon do mindahu, nung koruba yolo do lontugi, gonsuri, om guntomou nga olomus nopo yolo do gumuli id lamin. Nung korongou godu do mongongir do doungadau miagal do “ngir, ngir, ngir’, adadi iri kakadaaton tagayo iri soira mooi saan do waalon toi mooi panganu kayu maan do waalon. Tuni gonsuri di monorisit om lohok do paus nga apagon tomod o kadaat sokiro mooi panganu suduon tu kosorob do lamin. Ingkaa nogi soira i tulun do takad (tulun Ranau) mooi posondot do asil dumoon miagal ko sigup, om losun hilo id kakadayan Tamparuli, Tuaran, om Sosondoton Inanam, nung kotimbaba yolo do kadaaton, au no yolo milo tumilombus mamanau. Laang nopo wonsoyon diolo nga mundorong om modop do hiri tanga ralan ontok sodop dii toi ko pogulian nung au no osodu i kinaantakan. Sokiro nopo nokorikot no yolo hiri id dumoon om maso diolo do kumalaja miagal ko morobuat, om sigog ii nokorongou tuni tombolog nahagan, tombolog longkug, toi tuni paus nga mositi do mundorong kumalaja. Nung sumunsung yolo di kakadaaton, otumbayaan yolo do rumiou i totonomon diolo. Suai ko totonomon, haro nogi kotumbayaan do tumanus i kohorohoroon toi ko haro apatai di tulun koupuson diolo. Tumanud do kotumbayaan tinaru Kadazandusun, haro piipiro kawo tuni tombolog longkug i mongowit rati soosondii. Tuni nopo tombolog longkug di miagal do mamangkis “kiihoi, kiihoi” kaa nga panokatanda do haro tulun minidu pogun. Tuni nopo diri nga kaagal-agal kaka do osianan di tulun minidu pogun. Haro nogi tuni longkug di “koog, koog” kaa. Tuni miagal diri panakatanda do oupus toi orubatan kaka di 5
tulun minidu pogun. Nung korongou kawagu yolo tuni dau miagal do mongukut “kuut, kuut” kaa nga panakatanda do au no alaid haro mongukut (mongukad) do lobong. Kalasu-lasu kopio soira korongou tuni di tombolog dilo nung au no pantangon. Tinaru Murut nogi nga haro i kotumbayaan kokomoi kadaaton do tuni tombolog kinagaan (nahagan). Soira monguni do “trik,tik, tik” tintod mooi pokidupot om sumuang ii do talun nga osonong no do kaanu songinan o dupot. Ingkaa nogi nung koruba no lontugi dii monguni do “tik, tik, tik” soira mooi pokidupot, osonong nogi do au yolo sumunsung sabap araat o kadaaton miagal diri. Tumanud do kotumbayaan tinaru Murut, tuni nopo lontugi dii nga kosuruboyo kaka i minongoi pokidupot do moki loki mononsukud ontok do muli (Majalah Atukoi Kopivosian, 2010). Kogumuan tulun Kadazandusun mooi suang id talun mogihum do roun kobu maan panaap do walai, mogihum do kayu maan do pamaal, toi gunoon do siduon. Ogumu kadaaton loolobi po id kopuruan di apatut tomod do pantangon. Nung kokito pungit sontulud-tulud pitangaadau naamot mooi kobu toi mokikayu nga mositi no mundorong om tumingkod. Ingkaa nogi soira mooi panaan do kayu di naanu mantad, au obuli sumunsung di kakadaaton. Apangkal kopio o kadaaton miagal diti tu maan do pomonsoi lamin. Nung haro tulun sumunsung dii, otumbayaan yolo do kaanu kinaantakan au ongosogit-sogit i mongingion id suang lamin diri. Kinaantakan nopo di lobi apangkal nga lamin nopo di winonsoi momoguno kakamot dii naanu ontok haro kakadaaton nga osorob. Suai ko tayam om songongi, haro nogi kadaaton mantad koligagaanan di winonsoi tulun sondii miagal ko haro tulun do noliid (accident), napatai do inongoi giwis toi tinimbak. Kokito di walai nosorob nga adadi nogi do kakadaaton. Nung haro kinaantakan miagal diti, mositi i tulun id kampung diri do mundorong mantad kalaja. Au obuli morobuat om mooi suduon di miau. Nung aiso no kopio suduon id lamin, obuli ii do mooi pokisuduon nga mositi kayu di napatai toi ko’ riou. Ingkaa nogi soira aiso taakanon id lamin, obuli nogi yolo mindahu mooi pongukad do mundok, kasou, guol toi’ wo’oi. Obuli nogi mindahu mooi ponumad di tongo tayam miagal ko manuk, tungau om tasu id dumo diri. Kadaaton nopo diti nung insaru awayaan, manahak nogi do kobolingkaangan om kurutumon kumaa diolo. Haro nogi tulun di au kopio mamantang di kakadaaton. Nung tomodon diolo do au mingkorongou-rongou di tuni tayam miagal ko lohok do paus om daamot diri haro
6
tulun suai do korongou, adadi iri do iso kasalaan sabap au mamantang di norma masyarakat kolektif. Momori (momopol) nogi i tulun do suai diri miagal do: “Kumaus kou ii bo do au sumuni ilo parai (nunu-nunu totonomon) dikoyu.” Mooi do au korundun i kalaja dii pokimamahaon, milo nogi yolo do au mingkorongou-rongou di tuni tayam miagal ko lohok do paus. Sundung do ingkaa nga mositi do momurian kasari yolo mooi do au oontok do tumpadan. Nung koruba yolo do gonsuri id tindalanon, purianan diolo i gonsuri miagal do: i kakadaat i taraat i kokodonsoyon o taransoi i dapu mongingkotos i gonsuri , i puok paparasak do pongindapu poponiba topud-opud.
Sokiro mogitanud-tanud i tulun mooi pokikobu, honggo-honggo i nokokito lontugi toi gonsuri id tindalanon, au tagal do momisunud di tulun suai kokomoi kinaantakan di nawayaan diolo. Tudu nopo do ingkaa nga mooi do au korundun i wokon do kadaat. Mundorong po ii nokokito om soira do osodu-sodu no kapanahon di tongo koombolutan, mamanau nogi pogulian. Pomulanan (calendar) tinaru Kadazandusun nogi nga haro kadaaton i komoyon do tadau Tulandaat (D. Rozes Kisi, 1993). Tulandaat nopo nga mantad patod boros ‘tulan’ om ‘daat’. Tulandaat nopo dii nga manahak rati do kiwaa timpu tadau di manahak
korutumon toi
kobolingkaangan loolobi kumaa di momutanom-tanom om i sumusuang talun mogihum kodupot-dupatan, om mogihum pamaal do lamin. Tadau Tulandaat nopo nga timpu tadau di maan kopio pantango tinaru Kadazandusun di guugulu po. Haro piipiro tadau di komoyon Tulandaat miagal ko’ tadau Taang, Tolikud, Tontong, Rampagas, Limbas, Timpuun, Molot , Katang (Latang), Solimpuunon Tilimo (Giuk), Sukilob, Tonob (Piolitan), Gogor, Kointuru Kosilau Anaru / Oniba om Koinwalu Kosilau do Anaru. Mantad do hopod om tolu tadau diti, tadau nopo di pantangon tagayo nga id piolitin tadau Sukilob om Tonob. Otumbayaan o tinaru tokou do nung mongoi kalaja di dumo, sumuang talun, mooi pokisada id bawang toi nunu-nunu nopo kuama’on di gunoon montok pongindopuan nga kaanu i tulun diri korutumon toi kobolingkaangan tagayo miagal ko’ kotonob toi tumanus ngawi o rapo (kohoro-horoon) diolo. 7
Haro nogi susuyan toniba kokomoi kinointonodon do kadaaton om Tulandaat. Tumanud di Dongkiri
songulun bobolian mantad Tombotuon ( Kadazandusun Calendar 2012), haro
songulun tanak wagu di mororobuat. I nopo tanak wagu dii nga au po nokolio do komoyon do ‘kadaat’ toi ko’ ‘tulandaat’. Ii nopo parai nga nagamasan no dau o songintanga om sumurut nodii. Insan totuong, korongou yau mibagal ko’ haro tulun do momolohou. Soira intangai dau i songintanga parai di nagamasan dau nga nakagagang tomod i tanak wagu sabap nosiliu do botung. Ii nopo parai id sampaping nga osonong ngawi ii. Id botung dii, kokito i tanak wagu turu sumandak do modsu. Songulun nopo di kosumandakan diri nga olumis tomod o kokitanan. Ngoyo no di tanak wagu lisoko i rasuk di sumandak tolumis diri gisom do nokopodsu. I nopo tondu dii nga noowit di tanak wagu minuli id sulap dau gisom do nokopisasawo yolo. Soira naansakan nodii i parai om noomot diolo, angatai no di tondu i tanak wagu minongoi hilo id lamin dau. Osodu tomod o pinamanahan diolo gisom do kosoborong do onom o bawang. Iri nopo soborongan do koturu nga popodsuon. Kosoborong podii yolo om koruba no songulun tanak wagu i monuhu di kusai momutul do sawo dau. Koimpuunon nopo, au asaga i kusai momutul di sawo dau. Tontok dii potiromiton di kusai i dangol mantad tanak wagu diri, om siliu no i tondu do susumuni di roiton ‘kawong-kawong’. Otogod tomod i kusai do kawongkawong no i sawo dau. Maan nogi daa dau putulo i sawo dau nga insawat no i kawong-kawong do hilo id tawan miampai minimboros do, “Kousung ko no!” Minomisunud i tanak wagu di kusai diri do nung inggino isio hiri nga napatai no i kusai. Iri nopo tondu dii nga i Tonob, i tadau do Tulandaat. Tondu kumoduo nopo nga i Timpuun, i kotolu nopo nga i Sukilob, i kaapat nopo nga i Gogor, i kolimo nopo nga i Tongibul, i koonom nopo nga i Kadaaton, om i koturu nopo nga i Mantob. Angatai no di tanak wagu i kusai minuli hilo id lamin dau sabap nung muli i kusai hilo id lamin dau, au isio kotunud do ralan gumuli. Iri nopo tina di tanak wagu nga i Odu Minantob (songulun tumatamong do ralan di wayaan do rusod kumaa id Nabalu om papatalib diolo do orikot o kapatayon). Minomilin i Odu Minantob kumaa di kusai diri do au morobuat ontok do tadau Tonob toi ontok tadau Tulandaat di suai. Suai ko’ iri, au nogi obuli morobuat ontok haro kadaaton sabap kaanu korutumon i kusai miagal ko’ apatai isio. Minomuara nogi i Odu Minantob do ngawi-ngawi di tadau Tulandaat nga tadau Tonob no o adalaan taraat.
8
Koubasanan om Kotumbayaan Kadaaton Mongowit Korutumon? Kotumbayaan animisme miagal diti kadaaton nopo nga nosiliu iso piupakatan id masyarakat kolektif tinaru Kadazandusun mantad kinohinoon diolo id pogun Borneo. Masyarakat kolektif nopo nga au obuli do monongkiwal di koubasanan toi kotumbayaan sundung au osonong. Nung monongkiwal yolo, adadi yolo boboroson do tulun suai. Ii lobi apagon soira do au torimoon yolo sabaagi ahli komuniti. Komoyon nopo diti nga nung haro wonsoyon di tulun nokosongkiwal di koubasanan om kotumbayaan masyarakat kolektif diri, aiso o tulun mooi ponguhup soira haro pokiuhupan dau miagal ko momorilik, mogihum pamaal do lamin, monuridong do lamin om loolobi kosinduol soira kaanu kobolingkaangan miagal haro minidu pogun suang paganakan dau. Id suang toisoiso masyarakat, haro o nilai-nilai toi ideologi di nodadi obitua toi nolodi do lugu do masyarakat (Mudji Sutrisno & Hendra Putranto, 2005). Soira adadi do obitua, mositi no tumuku i ahli masyarakat diri. Mantad diti, kopisudongon kaandak do masyarakat adadi do pongimpou kointutunan sondii. Otorimo tulun diri sabaagi ahli masyarakat nung kopointutun no yau di pokionuon do masyarakat. Haro no tulun Kadazandusun do hiti Borneo di abad ke- 14 (Dayu Sansalu, 2008). Subetnik Kadazandusun miagal ko Idahan om Bisaya i nokopogulu nokointutun do sistom ponuatan maya kinosuangan diolo ugama Islam di kolimpupuson abad ko-14 om koimpuunon abad ko-15 nopo nga ogumo o kinoundolihon koposion ko’ mantad diti subetnik Kadazandusun do suai. Id timpu kopomolintaan do Kesultanan Brunei om Syarikat Berpiagam Borneo Utara (SBBU), tinaru tokou nopo nga kakal po do popoindalan pongindopuan dounguugulu montok paganakan sondii miagal ko’ morobuat, monginsada, mokidupot, om momogompi tayam. Nokuro tu okuri kinoingkokoton do tinaru tokou id gana ekonomi? Tumanud do informan ku kokomoi diti kadaaton, kosokodung nogi yolo do koubasanan om kotumbayaan do kadaaton mongowit do korutumon miagal do boros diolo do ingkaa: Informan 1: “Ii monusa bo’ kopio iti kadaaton! Aa’ haro nunu toongoi-ongoi nung kadaat no. Sominggu kadaat nga sominggu no aa’ koindahu.” Informan 2: “Sokiro nopo kadaat id tindalanon mooi posondot do binaboo nga gumuli nopo kaagu i mooi sondot do hilo’d walai. Osodu nopo kinopanahon diolo om modop pondo hiri’d puru. Haro nogi kosusui do gisom ngoyon kano tikus i posondoton diolo miagal ko’ wagas. Monusa bo’!” Informan 3: “Nung insaru au koporobuat, aiso no taakanon diolo.” 9
Informan 2: “Mamantang tomod bo dii kadaaton nga aiso i nunu-nunu o aanu.” Informan 4: “Patut no au nokokaya-kaya tulun tokou.” Soira numaan ku uhoto i informan do nunu o maan di tulun wonsoi soira kadaat, poingkaa o sisimbar diolo: Informan 1: “Om muli no hiri’d walai. Pakadaada.” Informan 2: “Momorisi-risi nondo di walai.” Informan 3: “Mooi no yolo pogiongkorumo. Iri no kasampatan do miruurumo.” Informan 4: “ Kasampatan do ‘aramai ti’. Ha!Ha!”
Kolimpupuson Id abad ko-21 diti, okito do agayo tomod o kinoungkaladon do rahung globalisasi. Globalisasi nopo nga iso bontuk kuasa kawawagu i monguhup poposikap kotonuson koubasanan om kotumbayaan dounguugulu. Globalisasi nogi nga sabaagi iso proses mongukab kinoyonon i popolodi
piolitan do pogun au nodii kapangantob kosuangon koungkaladon teknologi
elektronik, rahung do pongindopuan, porindustrian om komilaan sabap agen-agen globalisasi nopo diti nga nokosarabak no tomod id kinoyonon disan Pogun Kotolu mantad tadon koburuon kapitalis id Barat (Neilson Ilan Mersat, 2002). Proses globalisasi nopo diti nga mibagal ko’ mononsog do tulun do tumanud. Asanang tomod do kosuang o informasi kawawagu id koposion maya teknologi maklumat do dinondo. Mantad diti, okito tokou do proses globalisasi nopo nga koponguhup mananus om managak do koubasanan om kotumbayaan dounguugulu miagal ko’ kadaaton. Sundung do ogumo korutumon diti kadaaton loolobi po id gana ekonomi nga haro po kasari tinaru tokou do kakal po mamantang diti kadaaton loolobi po i au nokosuang ugama. Kadaaton di milo tokou potilombuson nopo nga miagal ko mamantang do tulun minidu pogun, om nasaraban do lamin. Kapamanatangan miagal diti au koponagak do nilai-nilai tobitua id masyarakat kolektif.
10
Bibliografi Dayu Sansalu, 2008. Kadazandusun di Sabah Pendidikan dan Proses Pemodenan 1881-1967. Kuala Lumpur: Dewan Bahasa dan Pustaka. D. Rozes Kisi, 1993. Pomulanan Tulun Kadazan/Dusun. Id suang Tanong om Susuzan do Kadazan Dusun, hlm. 33-38. Tanjung Aru: Koisaan Koubasanan Kadazan Dusun. Jabatan Perangkaan Malaysia Negeri Sabah www.statistics.gov.my/portal/images/.../sabah.html naanu di 30 Milatok 2013. Kadazandusun Calendar, 2012. Odu Magantob. Kota Kinabalu: Borneo Publishing & Printing Services. Kementerian Kebudayaan, Kesenian dan Pelancongan Malaysia, 1999. Memahami Kebudayaan Secara Umum. Id suang Seminar Kefahaman Budaya, hlm. 1-12. Kuala Lumpur: Kementerian Kebudayaan, Kesenian dan Pelancongan. Majalah Atukoi Kopivosian, 2010. Todpinai Tokou ih Magagasu om Mononopuk Komurutan. Keluaran Wulan ko-5, hlm. 33. Minah Sintian, 2012. Mantera atau Rinait Kadazandusun: Tinjauan dalam Aspek Pengamal dan Fungsinya dalam Kehidupan. Id suang Prosiding Simposium Bahasa dan Budaya Iban dan Folklor Borneo/Kalimantan 2 - 4 Nov 2012, hlm. 121-142. Minden: Universiti Sains Malaysia. Minah Sintian, 2013. Kepercayaan dan Amalan Masyarakat Kadazandusun dalam Pemeliharaan Alam Sekitar. id suang Prosiding Intelektual Kebangsaan Malaysia 17-18 April 2013, hlm.631-642. Tanjong Malim: Universiti Pendidikan Sultan Idris. Mongulud Boros Dusun Kadazan, 1994. Komoiboros DusunKadazan. Kota Kinabalu: Mongulud Boros Dusun Kadazan (MBDK). Mudji Sutrisno om Hendra Putranto (ed.), 2005. Teori-Teori Kebudayaan. Yogyakarta: Penerbit Kanisius. Neilson Ilan Mersat (2000). Globalisasi: Satu Cabaran Terhadap Pembinaan Negara Bangsa. dlm. Mohd. Yusof Kasim, Sabihah Osman (peny.).2000. Sabah & Sarawak dalam Arus Globalisasi. Bangi: Universiti Kebangsaan Malaysia. Suraya Sintang, 2007. Kehidupan Beragama Masyarakat Kadazandusun. Kota Kinabalu: Universiti Malaysia Sabah. Zubaidah Ibrahim , 2003. Perihal Orang Melayu: Sir Frank Swettenham. Trans..Kuala Lumpur: Penerbit Universiti Malaya.
11
Temubual Pn. Lombi binti Gungkat, Kg. Bundu Tuhan, ranau, Sabah, 20 Mac 2013 Pn. Suilin binti Dassim, Kg. Bundu Tuhan, Ranau, Sabah, 20 Mac 2013.
12
13
