Oètgave Vastelaoves Vereiniging de Moeraskwaakers 2005 Opgerich d n 11~11~1974

Oètgave Vastelaoves Vereiniging de Moeraskwaakers 2005 Opgerich d’n 1 11~11~1974.

M o e r a s k w a a k e r s

R e s

i d e n s i e 2 0 0 5

2

Leef Moeraskwaakers….. Zoeë as d’n dokter weer zaet “ ‘t Is weer d’n tièd van de koorts”, weej kriège ´t werm, ´t zweit dröppelt veur op de kop. D’r mót gekeuld waere met verfrissende drenkskes, asperientjes helpe heej neet, de temperatuur blief maar stijge en ´t stik ouk nog ens aan. ´t Geit op de vastelaovend aan, de vastelaoveskoorts sleit weer toe. De epidemie leet dit jaor al erg vruùg in ´t jaor, maar d’r is genóg medisien (gerstenaat) op veurraod. Dit jaor, 2005, geit de geschiedenis in van ´t jaor det geej neet mièr de vertrouwde “Kwaaker” in de bus krièg. Verniejing en verandering is ouk beej de Moerakwaakers niks niejs. Nao lingte van jaore ein niej uùterlik, ein niej jeske veur “De Kwaaker” met steeds mièr informasie. Zoeë krièg ouk de gemeinschap van ‘t Ven lanksaam ein steeds rumer jeske. ’t Ven breid oèt, ald-Venbewoeëners kómme truuk en andere nieje vestige zich in ’t Ven. Det haet neteurlik zien raeje. ´t Is heej moeëj woeëne met gen stadse eigenschappe maar d’r toch doeënbeej, Venlo ´t stedje van lol en plezeer. In ein toch hechte en gezellige gemeinschap, met alles waat we nuuëedig hebbe in de buurt. Alle nieje en truuk gekièrde Venbewoeëners in ‘t Ven wins ik van herte, welkom in ós “MOERASKWAAKERSRIÈK”. Um ´t moeëj en gezellig te halde in ós gemeinschap zulle weej heej op verscheie frónte SAME aan mótte werke, in de straot, in de buurt en binne de diverse vereiniginge die ´t Ven rièk is. Ein van die vereiniginge die heej ein steinke aan beejdruùg, zien “De Moeraskwaakers”. Ein vereiniging wao idderein lid van kin waere, maar wao ouk neet-laeje van en kinne genete. Ós aktiviteite zien veur de ganse gemeinschap en juus geschik um kinnis te make met buurtgenote oèt 'nne straot vaerderop. Same mótte weej d’r in ‘t Ven waat van make “van de Moeraskwaakers, veur de Moeraskwaakers”. 1e idee: Ze is d’r weer, veur die d’r nog gen hebbe, Ós Moeraskwaakersvlag. Versier óg straot met de vlag van de Moeraskwaakers. 2e idee: Kièk ens door deze Kwaaker en laot óg zeen en huùre beej ein van ós aktiviteite. ´t Moeraskwaakers-geveul is d’r veur alle Venbewoeëners, ´t is van en veur ós same. 3e idee: Vergaet ós adverteerders en spónsore neet, want ouk zónder eur kinne weej dit neet waormake. Ik wins óg allemaol nog ´t allerbeste veur 2005 en ‘nne gezellige vastelaovend .

Veurzitter Sjaak Driessen

Wilt geej óg hoès versiere met ein Moeraskwaakersvlag ? Te koup veur 15 euro, beej alle bestuursleeje, en beej ós aktiviteite. Geej krièg daobeej ein kortingbunke veur eine halder en vlaggestek !

3

4

Van de Vors….. Leef Moeraskwaakers, De vastelaovend en ’t getal 11 zien ónlosmakelik met mekaar verbónde. Met die weitenschap en ’t gegaeve det waat geej noow laes ‘t 11 e stökske is det ik veur ’t vastelaovesbukske schrièf, laot ik óg weite det dit tegelièkertièd mien letste beejdrage is op dees plaats. Nao 11 jaor in dees funksie vind ik ‘t tièd gewaore um de scepter euver te drage. ‘t Winnende vastelaovesleedje van dit jaor beej de Jocus had dan ouk genne baetere titel kinne hebbe dae strakkes van toepassing is: Kièk nog eine kièr um! Allerièrs wil ik um kièke nao de vastelaovend van ‘t aafgeloupe jaor. Alle aktitviteite van ós vereiniging zien naogenóg vlekkeloos verloupe en dao wao ploeëje gladgestreke meuste waere is det ein lièrschoeël veur ’t kómmende jaor. As veuroploupers in ’t Ven hebbe prins Hay I met zien adjudante John en Ger de ker mótte trekke, en zeej hebbe zich oètstaekend in eur rol ingelaef en veur de nuuëdige stumming gezörg. ’t Waas dan ouk doeëdzund det op ’t “moment suprême” detgene waat weej noeëts in de hand zulle hebbe ’t verschrikkelik leet aafweite: ’t waer dus! De Vense optoch haet gen slechter waer gehad dan deze kièr. Óndanks det waas d’r toch eine houp volk op de bein um d’n bóntgekleurde stoet veurbeej te zeen trekke. En det al die luuj wies ’t lets zien bliève staon guuëf de waardering aan veur detgene waat de deilnemers hebbe neergezatte. ’t Is zaak um dees kwaliteit en kwantiteit te handhave of, lever nog, te verbaetere. De Moeraskwaakers hebbe zich weer van eure beste kant laote zeen: jónk en ald hebbe same de vastelaovend gevierd wie zich det gehuùrd, met lol en plezeer, joeks en jen, eine lach en sóms ein traon, veuropgegaon door ’t trio en ós jeugkwartet. Maar ’t kin neet dök genóg gezag waere: dae ganse vastelaovend in ‘t Ven waas neet meugelik zónder de inspanninge van de diverse kemissies die achter de scherme alles organisere en regele en sóms ein geweldig improvisasievermeuge mótte hebbe. Ein aktiviteit wil ik heej toch beleechte: de sleuteleuverdrach. Dit gebeure stook d’r aafgeloupe kièr letterlik en figuurlik met kop en schouwers baovenoèt. Daag is d’r nog euver gespraoke: de opkóms van d’n ingel Gabriël um de nao um geneumde straot “offisjeel” te äöpene. Jaomer det d’r waat weinig minse getuùge van zien gewaes maar die d’r waare, die hebbe genaote. De organisasie van dit gebeure waas neet meugelik zónder de meiwerking van -en die wil ik met name neume- de Vullings-breurs die alle materiale beschikbaar stelde en de vreejwiligers die deze zaoterdaag opofferde um mei op te bouwe en aaf te braeke. Ouk det is kinmerkend veur de saamhuùrigheid in ’t Ven. As ik daonao dan umkièk nao de aafgeloupe periode van 10 jaor as Vors van de Moeraskwaakers, meuge weej as vereiniging gruuëts zien op de waardering die weej kriège veur de organisasie van de vastelaovend en zoeë as deze in ’t Ven wuùrt belaef. Ik heb ’t as plezerig ervare dao ein beejdrage aan te meuge levere. Alle minse die de aafgeloupe jaore eur steinke hebbe beejgedrage zien daobeej eine steun gewaes. Maar ’t allerbelangrièks zien de steun en ruumte die ik van ’t thoèsfrónt heb gekrege, want as me det neet same duit, haet det ziene weerslaag op ’t funksionere. Mien letste etappe is al begónne, de veurbereidinge zien al in vólle gangk. Op ’t moment det ik dit schrièf mót d’n aaftrap nog gegaeve waere, d’n elfde van d’n elfde is al in zich. En veurdet weej d’r erg in hebbe steit de zitting al weer veur de deur. ’t Sezoen begint vruùg, de 15 e jannewari al. Weej kinne dit jaor zegge det we d’n ièrste optoch in Limburg hebbe, messchien waal in ’t zuuje van Nederland, maar dao staek ik mien hand neet veur in ’t veur. Maar det is zeker ein raeje um d’r ein geweldig fees van te gaon make met vuùl deilnemers, klank en kleur. Weej zien d’r klaor veur en haope óg op ein van ós aktiviteite te meuge zeen. In november 2005 kièk ik nog eine kièr um en ónder ’t genete van ’n suupke met herinneringe kómme dan al die jaore hoem(papa) veurbeej en zal ik mich realisere det ’t jeske van 11 jaor neet mièr oèt de kleierkas zal kómme….. Ik wins óg en ós ‘nne fantastiese vastelaovend, same!

Vors Moerassius Gerard van Gestel

5

6

Weej gaeve d’r einen drei aan….. As geej in ‘t waordebook opzeuk, waat de oètdrökking "d’r einen drei aan gaeve" beteikent, dan laes geej dao: ièts in ein ander leech stelle. De Moeraskwaakers hebbe dit as mótto gekaoze veur de kómmende tièd. Eine spreuk dae hielemaol pas beej Vastelaovend viere. Want waat is Vastelaovend anders, dan effe ein paar daag/waeke/maonde met ièts andere ouge kièke nao de werkelikheid. Det is hièl gezónd: effe op ein carnavaleske meneer aafstand neme van “de ernst” van d’n daag.Humor “relativeert”, mak ós los en vreej, is speuls en is ‘t taege-euver gestelde van ’t heilige mótte. Humor is in ‘t laeve is hard nuuëdig, want ‘t blièk det weej ós zelf altièd weer, zoeë óntzettend serieus neme. Det ós daag zier “ernstig” zien, is euverduùdelik. Ouk in ós eige land zien vólop spanninge en al oètwasse van haat, nièd en aanslaeg. Idderen daag, waere weej dao opniej op geweze. Effe dao aafstand van neme, gaef ós rös en de krach, um mièr óntspanne nao de werkelikheid te kièke. Maar pas op. … Dao zien twieë saorte minse. Dao zien minse die laeve, as of d’r niks aan de hand is. Die trekke zich nörges waat van aan. Waat eur aan geit kin de halve waereld vergaon, as ‘t eur helf maar neet is. Det ander saort minse mak zich waal zörg. Zeej zeen det dit gewoeën neet kan, waat d’r allemaol gebeurd. Zeej wille ‘t ech anders. Haopelik huurt geej beej ’t twieëde saort minse en wilt geej óg steinke beejdrage aan veranderinge die good en baeter zien veur ózze waereld. Effe Vastelaovend viere en op ein gezónde meneer effe aafstand neme van de dagelikse sleur, mak nieje krachte in óg los um de waereld te verbaetere. Op Aswoensdaag gaeve weej mekaar daoveur opniej de opdrach. Dus.….. zeker effe Vastelaovend viere, maar dan weer aan de slaag. Pestoeër J.M.Kunnen P.S. Wilt geej alves op de kalender van 2005 “de Vastelaovesviering met de Moeraskwaakers” schriève, veur jónk en ald en waal op zaoterdaag 29 jannewari 2005 um 19.15 oor, meschiens nog in ós Michaëlkerk. As ‘t anders is, huurt geej det op tièd. Weej viere, det weej beej mekaar wille hure, in leef en leid. Wilt geej ouk neet de viering, met de Moeraskwaakers van Aswoensdaag vergaete, die is op 9 fibberwari 2005, ouk um 19.15 oor !

Beste Moeraskwaakers….. As ik dit stökske schrièf, hebbe weej de jäörlikse feesaovend al achter de rök. Eine zièr geslaagde aovend, met ein “ludiek” optraeje van ’t aaftraejend Trio van 2004, ’t ière van ós jubilarisse, mezièk van joekskepèl “Schöd um laeg”, de leedjes van Leo & Marcel, ein gasoptraeje van de Vense Heino (snieëwit haor en zónnebril) en de bekindmaking van ‘t niej motto door de jeugkemissie “ weej gaeve d’r einen drei aan”. Zoeë as geej heejbaove kint laeze, waas ’t eine joeksige aovend met ein good gevöld programma. En weer ens, hebbe de thoèsblièvers op deze aovend, de äöpening van ós Vense vastelaovessezoen neet mei gemak. Ik dink (en vuuël met mich), det geej dao achteraaf spièt van heb det geej neet ziet gewaes! Ouk al is ‘t herfs en raegent ’t noow boète, wil ik dit jaor de jeugkemissie ens in ’t zunke zette. Idder jaor opniej, zörge dees minse dao veur, det de jeug van ’t Ven op ein plezerige meneer eure vastelaovend kin viere, op twieë “grandioze” jeugmiddage. Ouk eur beejdrage aan ózze Vense optoch is van groeët belang. Ik roop beej deze, alle Venbewoeëners, buurtvereiniginge, vrindeclubs, kaartclubs, dameskrenskes en zoeë vaerder op, um dit veurbaeld op te volge en in groeëte groepe mei te doon met ózze eige Vense optoch. Geej mót d’r waal raekening mei halde, det dae optoch al op 23 jannewarie door ós Ven trekt. Zaoterdaag 15 jannewari is de zitting, wao op ’t Trio 2005 wuurt oètgerope. Ik kin óg alves verraoje, det det eine knalaovend wuurt. Met hièle gooje artieste, joeksige buuts en ……… Maar det zeet en huurt geej waal as geej kómp, dus, laot ’t dit kièr neet aan óg neus veurbeej gaon! Veur de res van ‘t programma van de Moeraskwaakers, verwiès ik óg gaer, um vaerder te kièke in dit prachtige bookwerk! Vastelaovond Same ! Ógge kastelein Pau Savelkoul.

7

8

In 't zunke….. Ózze Frans Timmermans is 20 november gehuldigd in de Orde as “Lid van verdeenste”. Ein ónderscheiding van 't BCL, d’n Bónd van Carnavalsvereiniginge in Limburg en aangevraog door de V.V. de Moeraskwaakers. Dees ónderscheiding krièg hae neet zoeëmaar. Dao ging ein jaorelange staot van deens aan veuraaf. Lid vanaaf 1977 en nao in 't Trio van 1981 as adjudant gedeend te hebbe, waas Frans neet mièr weg te dinke oét de Vense vastelaovend. Jaore aktief as bestuurslid, stónd hae ouk aan de weeg van ós programmabukske wao hae aan mei haet gewerk um det te laote oètgreuje tot “De Kwaaker” dae weej noow hebbe en wao weej met zien alle gruuëts op kinne zien. Vuuël jaore haet hae same mei de artieste gekóntrakteerd die optraoje op de zittinge van de Moeraskwaakers en andere aktiviteite van ós vereiniging. Heejbeej waas um gen dörp of buurtschap te vaer, um die te gaon bekièke of te beluustere of ze ouk aan zien verwachtinge kóste voldoon. Frans zoot mei in de kemissie, die verscheie Trio’s ónder eur hoede, de vastelaovend in haet zeen gaon. Idder jaor weer oétzeen nao emus, dae heej geschik veur is en die zeej dan weer deje veurbereide en begeleide tot aan eur oètrooping. Frans waas altièd, en noow nog, in veur verniejing, good waas neet altièd good genóg. Hae ging ós veur, beej verscheie werkzaamhede, maar beej de aktiviteite vónd se um altièd op de achtergrónd. Veuraan staon hoofde veur um neet zoeë nuuëdig. Zelfs beej de oétnuuëdiging van zien höldiging ware zien weurd: “veur mich ein ónderscheiding? Nae, d’r zien nog zoevuuël andere die ouk vuuël doon en gedaon hebbe”!!! Frans, weej vinde waal, des dich dees waardering hebs verdeend. Weej winse dich, des se nog vuuël plezeer blièfs belaeve aan de vastelaovend en weej haope, nog vuuël jaore van dien deenste maar veural van dien ervaringe gebroeëk te meuge make. Bestuur & leeje V.V. de Moeraskwaakers.

"D’n Opstaeker"….. is ein ièrbetoeën aan alle vastelaovesvreejwilligers As 't aan de veer stadsdeilvereiniginge (Venloosch Vastelaovesgezelschap Jocus, Bliëricks Vastelaovesgezelschap De Wortelepin, Vastelaoves Gezelsjap D’n Oeles en Carnavalsvereiniging "De Belhamels") van de gemeinte Venlo leet, löp idderein de kómmende vastelaovestièd rónd mit "D’n Opstaeker". "D’n Opstaeker" is ein soort speltje, dit jaor óntworpe door beeldend kunstenaeres Monique Bruls, det jaorliks zal truukkómme en det steit veur ein dreejtal zake: - einen blièk van waardering veur de vuuële vreejwilligers die alle saorte vastelaovesaktiviteite organisere in Groeët Venlo - einen blièk van betrokkenheid mit de vastelaovend - eine financiële opstaeker veur de vastelaovesvereiniginge in de gemeinte Venlo. "D’n Opstaeker" is ein initiatief van de Raod van Elf van Venloosch Vastelaovesgezelschap Jocus wao alle andere vastelaovesvereiniginge in de gemeinte Venlo aan meidoon. ‘t Idee óntstónd aafgeloupe mièrt in Basel, wao ‘t bestuur van Jocus, vastelaovend 2004 evalueerde. In Basel, wao de vastelaovend tradisiegetrouw ein waek later velt, bleek idderein, dae vastelaovend viert, ein insigne te drage, dao “Plaquette” geneump. Ouk in staej wie Kölle en Düsseldorf zien saortgelièke speltjes te koup. Alle vastelaovesvereiniginge van Groeët Venlo gaon ‘t vastelaovesinsigne verkaupe. "D’n Opstaeker" kós 5 euro. De verkoup vindt plaats ónder auspiciën van de 4 stadsdeilvereiniginge, die as inisjator verantwaordelik zien veur de spelt. "D’n Opstaeker" is te koup beej al ós aktiviteite, maar ouk beej; Kapsalon Claudia Verbeek Gipmans Gabriëlstraat 1 Kapsalon L’Avenir J.Huybreghts Gabrielstraat 15 Feestzaal ’t Ven = Moeraskwaakersresidensie Laot zeen det geej de vastelaovend ein werm hert toedraag en staek um op!

9

10

Baer, de wandelaer….. ‘t Waas november. De daag woorte korter, de buim steeds kaler en Baer steeds nerveuzer. Hae wis namelik, 't is d’n tièd det 't trio van de Moeraskwaakers wuurt oétgezóch. En umdet Baer elk jaor met ziene kaartkammeraod Sjaek deej wedde wae de prins woort, deej hae d’r alles aan um det al veur de zitting te weite te kómme. Van dao des se Baer sinds 'n paar jaor vanaaf begin november ’s aoves vuuël door 't Ven zuùs wandele. 't ièrste jaor waas det maar 'n gek gezich um emus euver de Schoeëlwaeg, de Straolsewaeg, um de viëver en dao euveral te zeen laupe, zoeë gans allein, en euveral nao binne te zeen gape. Blièkbaar vónd hae det zelf ouk, dus had hae zich 't jaor daonao veur ziene verjäördaag aan Sjaek ein h'ndje gevraog. Sjaek had zich neteurlik neet laote kinne en had zich oét 'n asiel zó’nne kleine witte keffer gehaold, van 't ras gäötefiks, zó’nne stekmik op veer puuët, met zó’n zwarte vlek um 't linkeroug en de stert altièd umhoeëg. Baer waas d’r bliej mei gewaes en neumde um Harie. Zoeë wandele Baer en Harie dus al 'n paar jaor door 't Ven, waobeej 't andere wandelaers opveel desse Baer dus van november wies jannewari vuuël dökker op straot taege kwaams. Maar óndanks zien lange wandelinge waas hae d’r nog neet éine kièr in geslaag um al veur de zitting te weite te kómme wae in 't trio zoot. Maar gelökkig Sjaek ouk nog neet. De ièrlikheid gebiet waal te zegge, det det 't veurig jaor veur Baer auk neet mekkelik waas, met 'nne prins van de Boswachterswaeg en 'nne adjudant van de Middewaeg. Det is um toch te wiëd wandele en det is ouk gaar neet good veur die kleine puuëtjes van Harie, had ziene hoeësdokter gezag. Maar dit jaor zoel 't lökke had Baer aan Harie belaof. Harie begós namelik toch al op laeftièd te kómme en woort ouk waat korter van aom. Zoeë wièd kós hae d’r dus nimmer mei gaon wandele. Maar det kwaam good oét, want hae had 'n veurgeväöl wao hae 't dit jaor meus zeuke. Beej de kapper hadde ze um namelik gezag det 't dit jaor d’r intelik eine van de gebreurs Theele zoel waere. Gezag woort namelik det dae Hans zich ekstra as jeugleider beej FCV had aafgemeld um tièd vreej te halde. En van Jac woort gezag det hae zich 'n zwumbad had aangelag en de vruikes van de veurzitter en de vors al zoel hebbe belaof det die van de zomer beej um in det zwumbad mochte kómme kiellepe. En dus wandelde Baer vanaaf november aovend nao aovend euver de bekinde Schoeëlwaeg en de Nazarethstraot. En dao, op eine aovend dach Baer “hebbes”. Harie, dae òndertösse de waeg in 't Ven haos net zoeë good as vruùger Piet de Melkboer kós, waas zich net taegeneuver hoèze Theele op de Schoëlwaeg gaon zitte um de brökskes die hae gegaete had 'n fijn plaetske te gaeve in 't graas, wie Baer dao de veurdeur aope zoog gaon. Hae schrók zich 't apezaor! 't waas vors Moerassius dae nao boète kwaam met 'n groeëte täöt. “Dao zit neteurlik de prinsemuts in” dach Baer. Die zal hae Jac waal hebbe laote passe. Gans opgewónde leep Baer snel nao hoès toe um Sjaek euver zien óntdekking te gaon belle. D’n erme Harie kreeg nog genne tièd mièr um spaore te zeuke en ein puuëtje op te höffe, zó’nne häös had zien baasje. Gans boéte aom thoès aangekómme, ging net de tillefoon. “Jao heej met Sjaek”, hoort Baer aan de andere kant. En nog veurdet hae Sjaek kós vertelle waat hae zoeë juus had gezeen, vroog Sjaek um, “zien ze beej dich al aan de deur gewaes”? “Wae” waas 't einige waat Baer d’r nog oét kreeg. Hae hiégde namelik nog zoeë vuuël, of det hae net de Genraoydel waas opgereeje op 'nne fiets met 'nne platte tuup. “Die van de Moeraskwaakers”, waas 't antwoord van Sjaek. “Die zien namelik deur aan deur rónd aan 't gaon in 't Ven um te vraoge of de minse nog gerei hebbe veur de rómmelmert. Heb se trouwes al einig idee wae de prins wuurt dit jaor”? “Nae” zei Baer, “en um ièrlik te zien kin 't mich ouk niks schaele. Ik mót noow trouwes ophange want de bel geit. Det zal d’r waal eine van de Moeraskwaakers zien. Hoije”. Wiel Wuler

Rómmelmert V.V. de Moeraskwaakers is letst april 2005. De juuste datum wuurt nog bekind gemak !

11

Tombola….. Ouk dit jaor organisere weej d’n tombola tièdes de zitting. Door heej aan mei te doon spónsort geej de vereiniging zoeëdet weej in staot zien um de vastelaovesaktiviteite veur jónk en ald georganiseerd te kriège. Weej hebbe dit jaor weer neet tevergaefs beej ós trouwe spónsore aangeklop veur prièze. Spónsore, hertelik bedank veur óg beejdrage !!! In d’n tombola zitte weer elf stöks fantastiese prièze zoeëas geej det de letste jaore van ós gewind ziet. De lötjes veur d’n tombola waere veur ‘t begin en tièdes de pauze van de zitting verkoch. De trekking wuurt op ‘t lets gedaon en nao aafloup van de zitting kint geej de door óg gewónne prièze aafhaole en gelièk meineme. Weej winse óg vuuël gelök en gooje prièze en ‘nne fijne vastelaovend. Names V.V. de Moeraskwaakers, Hans Hendrickx Jan van Rensen.

12

Verwóndering….. Eine naate daag waas 't. Det kins se waal zegge. 't Water dreef mich naeve mien kleier. Al jaore lang meuste weej ‘s werkendaags, waer of gen waer, 't land op. Ploge, paote, gaeje, ougste. 't Spannenste waas 't, as ik achter 't paerd meugde loupe um de voor te trekke. Met de plooglien stevig in de hand veulde ik mich wie eine keuning. Vól verwóndering waas ik dan euver mooder aerd. Dao greujde en bleujde toch zoeëvuuel moeëjs. Maar vandaag had ik 't neet. Ik veulde mich wie eine verzouwde kater. Dae mats waas ik mièr dan zat. Mien gedachte zónke weg. Wie zoelle zeej det vruùger gedaon hebbe vroog ik mich in verwóndering aaf. Gaar neet, bedach ik mich tegelièkertièd. Nae, vruùger waas dit land ón-óntgónne. Heej greujde in dae zómp niks fetsoendeliks. Waat buim en hei, det waas 't. Later toen dae lange waeg nao Straole door de Keizer woord aangelag, zoog de mins pas wie moeëj 't heej waas. Lanksaamaan kwame de ièrste minse oèt de stad um heej te woeëne. Mós se noow zeen wie vuuël det 't d’r al zien. 't begós harder en harder te majjeme. 't Waas meines veur dae dao baove met ziene ingel Gabriël as lièfwach. As ‘nne haas ging ik maar op hoès aan. Ik had zat gekraos tösse de temate en de kómkómmers veur vandaag. Thoès aangekómme drónk ik kóffie, oot mich ein paar vimme en snierkde ein sigaerke. 't Waas zoeë kald det ik de kachel op räökelde en mich ging zitte in d’n ensigste praos dae weej in hoès hadde. Dao kwaam mich nemus aan, dae waas veur mich en nemus anders. Heej druimde ik mien moeëjste druime. En zoeë is 't gekómme. Dae zelfde daag nog makde ik de ièrste teikening. Noeëts mièr, hoofde ik nog naat te waere as ik de voor trok. Gans van glaas bouwde ik ‘nne kas. 't zunke scheen dao doorhaer en de temate en kómkómmers greujde en bleujde. Idderein kwaam kièke. Vól verwóndering en met bewóndering zoge zeej wie dèt kós. En zoeë is 't gekómme det einen tuinder neet mièr tuinder hit, maar gerdeneer. Verwónderlik of neet sóms? Ger Deneer.

Truujenaovend 27 jannewari 2005….. Leef Vense truuje, Op dónderdaag 27 jannewari is 't weer zoeëwièd. Dan is de Sabbel allein en ouk maar allein aope veur ós Vense truuje. Genne kaerel dae dao dan nao binne dörf te kómme. Op 't Prinselik Trio met gevolg nao neteurlik, want die kómme um ein oor of twelf ens kièke wie 't ós truuje vergeit. De letste jaore wuurt 't Prinselik Trio ingehaold door ós eige Truujedansgarde, die dan aan de deur steit um de manne op ein truujwaerdige meneer te verwelkómme. Ouk 't aafgeloupe jaor stónde zeej weer trouw in vol ornaat te wachte aan de Sabbelpaort, maar ocherm, gen Trio, wao zoele die toch bliève? De dames kóste wachte wies zeej ein óns woge en keke wie einen boetsauto wie 't hoeëg ge-ièrd stel inens van oèt d’n achteringank de kefee binnekwaam. De truujkes ware waal ein bietje op eur tieënkes getrap umdet de hière eur luùs in de pels hadde gepaot, maar 't kómmend jaor zal de Truujedansgarde vas waal weer paraat staon um 't kersverse Trio welkóm te heite. Maar noow genóg getäöt, Vense truuje, dae gezellige aovend kump d’r weer aan en idder jaor staon de truuje d’r weer verrassender op. De alderwetse zwarte truujeploète verdwiene ein bietje oèt 't zich en make plaats veur waat gewaogdere kleurrièke pekskes, Iddere truuj guf zelf einen drei, jao geheid, aan wie zeej daen aovend geit gekleid. De moderne truuj, 't is ièrlik waor, kees steeds dökker veur 't jeske van 't jaor. Jao, wie ze gekleid geit, leef luuj, det leet aan de buuj van de truuj. Vuuël truuje zörge zelf veur ein hepke (vimme, broèn of wit, kiepepuuët, ein suupke mit) en de kastelein zörg veur ein lekker klepke. Kóm dus allemaol op 27 jannewari nao de Sabbel, want de wins van iddere mins is toch deste d’n aovend met plezeer begins en 't ouk gezellig vins, d’n bieës oèt hange kins en meugs danse met de Prins. Weej make d’r dan weer eine schitterende joeksige aovend van, wao se ’s anderdaags nog eine kièr nao um kins kièke ! Ein Truuj.

Twieë gezellige truuje !

13

‘t Trio 2004 schrièf….. Waat ware weej bliej det 31 jannewari aanbrook. Intelik ware weej verlos van ’t geleeg en ’t stiekeme beejein kómme. ’t Waas al wièd in oktober wie de vors ós vroog of weej in de Vense vastelaovend veurop woele gaon. Eigelik hadde weej verwach det dees zaak al lang geregeld waas, des te groeëter waas veur ós de verrassing. De leuke aovende en de veurbereidinge die heej aan veuraaf ginge, met of zónder de vruikes, ware ónvergaetelik. Mennig kretje beer is tièdes dees kreatieve aovende keps gemak, maar óndanks det ware weej noeëts knap zat. Oètintelik waas ’t dan zoeë wièd: ’t oètkómme! Veur ós ’t hoeëgtepunt, met de “Final Countdown” van “Europe”, wie weej as rockers met ós gitare opkwame. Beej ’t naopraote, waat ouk veur ós eine ónvergaetelikke middaag waas, is ’t idee gebaore um ‘t optraeje van ’t oètkómme te herhaole, veur de femilie en de andere gaste. Meschiens is heejdoor weer ein nieje tradisie óntstaon!!! Zoeëas altièd in ’t laeve zit ’t dök mei, maar ouk waal ens taege. Veur ós waas det, dae schoeëne optoch, waorin weej alles krege waat God ónder d’n hemel haet. Weej hebbe ouk hièl waat resepsies bezóch, maar ein dao van zal ózze prins Hay I zich altièd bliève heuge. Want hae wis hièl zeker det hae ziene trouwrink had umgedaon! Det woort ouk nog bevestig door eine van zien adjudante. Idderein in Casele ging met de neus euver de vloer, maar eine rink woord d’r neet gevónde. Oètintelik loog dae rink thoès op ’t nachkesje. Op de groeëte resepsie, det ein schoeëne heppening waas veur ós, woort met prins Hay I ziene rink nog dök d’n draak gestaoke. Weej kinne nog waal ein oor schriève euver dae geweldige tièd, maar det doon weej neet. Waal wille weej langs deze waeg ós vruikes en kinder, maar ouk zeker ’t bestuur van de Moeraskwaakers en andere persoeëne van herte bedanke veur de steun dae weej tiedes dees regeerperiode gehad hebbe. Res ós, ’t nieje trio van 2005 net zoeë vuuël joeks en jen toe te winse, as det weej hebbe meuge meimake. Maar zoeë KNAP ZAT as weej ware, zal ’t nieje trio noeëts waere. Weej winse óg ‘nne schoeëne vastelaovend. ’t Trio van 2004

Óptraeje van ós niej Trio 2004. Wae zoel ‘t dit kièr zien ?

(Prins) HAY I, (Adjudante) JOHN & GER

Trio 2004 in vól órnaat !

Oètbringe van fillicitasies aan ein bevrinde vereiniging

14

De ervaringe van ’t Jeugkwartet van 2004….. Op 7 fibberwari woorte weej met ein präötje nao ein geheime plek gelok. Juulke waas d’r as ièrste, het ging zoeëgenaamp kleier koupe. Daonao kwaam Luuk, dae ein kedootje veur zien gäöl ( paettante) meus haole. Joep kwaam as derde in zien vootbalkleier, hae dach det de vootbalwedstrijd vervruùg waas. Sanne kwaam as letste, het meus gereidschap veur zien vader ophaole. Maar d’r kwaam ein groeëte verrassing: ’t Nieje kwartet woort bekindgemak, en weej waare de gelökkige. ’t Waas meujlik um taege nemus waat te zegge wies aan ’t Jeugbal. Dao kwaam ’t groeëte moment. Weej woorte oètgeroope as ’t nieje kwartet van 2004. Toen begós ’t ech, 8 fibberwari d’n optoch in ’t Ven. Dao woorte weej gelièk gezaegend (naat). Weej ginge van de eine resepsie nao de andere, de Groeëte Prinseresepsie van ’t Trio, de crèche, ’t schoeëlbal en as hoeëgtepunt ós eige resepsie, wao idderein ós kwaam fillicitere. Weej veulde ós hièl bizónder en vónde ’t hièlemaol geweldig um dit mei te meuge make. Veur ós kwaam einen druim oèt. Weej winse ’t kwartet van 2005 net zoevuuël lol en plezeer as weej gehad hebbe. Vastelaovend Same Prins Joep, Prinses Juulke & Adjudante Luuk en Sanne

Ós jeugkwartet V.V. de Moeraskwaakers 2004

De spanning is veulbaar……... !

De koedeljach V.V. de Moeraskwaakers 2004

Beej de bewaarschoeël !

Pfffffft effe oètblaoze ! 15

16

Ik ingel Gabriël, daal neer um mien straot te äöpene !

Ós Trio en Jeugkwartet 2004

Ós Trio 2004 met eur vruikes

Vors Moerassius, met de letste gerdeneer !

d e

e n

g r o e ë t e

k l e i n e Dit sprik veur zich zelf !

Sirremoniemeister

Oètslaeg van de optoch 2004….. Einzelgänger

Kleine Groep

Groeëte Groep

Wage/Ker + Groep

1e Jac Hoogewerf

1e Marian Achten

1e Groep 7 + jeugkwartet

1e Altiëd Wat

Eine bums wie eine eimer

e

2 gen deilname 3e gen deilname

Weej zien knap zat

e

2 Edwin Smith Choco Prins

3e Ingrid Theelen

e

2 Roel Lommen Weej zien knap zat

3e Peter Gaal

Afrikaanse Trommelaers

e

2 Zooitje Óngeregeld Paradijsvogels

3e Kelly van Rijn

3 - 2 - 1 - Steijn

Weej zien knap zat veur Hawaii

Names ’t bestuur & leeje van V.V. de Moeraskwaakers Perficia !!! De baekers en de wisselbaeker “de stampofoon” zien gespónsord door: “ Sportprijzen & graveerwerkspecialist” Fa DAS Venlo - Roggel (Dutch Archery Specialist) www.dutch-archery.nl

Winner van de wisselbaeker “de Stampofoon” is gewaore: ALTIÈD WAT met eur motto : Geej weert ós knap zat want weej slaon alles ! (en dae wónne zeej veur ‘t twieëde jaor op ein rie)

17

18

Programma 2005….. *

* * * * * * * *

* *

Zaoterdaag 15 jannewari: Zitting Aanvang van de zitting is um 20.11 oor. De zaal is aope vanaaf 18.45 oor. 't Nieje Trio wuurt oétgerope op deze aovend. Kaarte, zien veur 9 euro te koup beej: Friture 't Ven, Feestzaal 't Ven, Café De Hazewind, Gebr. Driessen Groente en Fruit en de kapsalons L'Avenir en Claudia Verbeek-Gipmans. Zóndaag 16 jannewari: Naopraote. Vanaaf 16.00 oor kan d’r ónder 't genot van ein glaeske beer en ein häpke, waere beejgepraot en kan 't nieje Trio 2005 waere gefilliciteerd. Vriedaag 21 jannewari: Kroegetoch. Um 19.45 oor vertrek de bus en waere ein paar kroege bezóch. Zaoterdaag 22 jannewari: Jeugprinsebal. Vanaaf 16.00 oor begint de prinsebal veur de jeug. Hoeëgtepunt is 't oétrope van 't prinselikke Jeugkwartet. Zóndaag 23 jannewari: Vense optoch. Vanaaf 14.30 oor vertrek ózze optoch weer door ‘t Ven. Deilnemers mótte zich opstelle op de plaats beej Gipmans in de Alde Törfstraot um 13.45 oor. Dónderdaag 27 jannewari: Truujenaovend. Deze aovend is in de kroeg in ‘t Ven vanaaf 20.30 oor en ……… verbaoje veur manne. Zaoterdaag 29 jannewari: Vastelaovesviering. Um 19.15 oor vastelaovesviering in de kerk met o.a. 't Trio en ‘t Jeugkwartet en eur gevolg. Zóndaag 30 jannewari: Prinseresepsie. Vanaaf 17.00 oor kin idderein 't prinselik Trio kómme fillicitere. Zaoterdaag 5 fibberwari: Sleuteleuverdrach. Um 19.30 oor vind op de Straolsewaeg, beej de parkièrplaats van Rekafa, dao krièg 't Trio en 't Jeugkwartet weer de sleutel euverhandig, dae toegang guuëf tot ‘t Ven. Aansloètend is vanaaf 20.30 oor in de residensie weer de…Straolende Sterrebal. Zóndaag 6 fibberwari: Resepsie van 't Jeugkwartet. Vanaaf 16.30 oor kint geej 't Jeugkwartet kómme fillicitere. Woensdaag 9 fibberwari: Aswoensdaag. Tradisioneel wuurt de vastelaovend weer aafgeslaote met ein viering in de kerk, wao 't assekruutske wuurt gegaeve. De viering begint um 19.15 oor. Aansloètend is d’r hièringschelle in de residensie.

Steilrand….. De steilrand dao wao oeits Mooder Maas eur wilde stroum leet struime wao de Rien in ‘t kuulke van de rök kabbelend de waeg haet gezóch De steilrand as einen oètkièk de stad zuùt met aan zien ziej det dörp Zoeë as eine parel moeëj gelaege De steilrand aan zien veut de kes der gerdeneers praote taege d’n hemel de gaele schièn tot wäörd heet gebrach

De steilrand oèt ’t aanzeen van de wind ‘t glaas de wermte mak De Steilrand In de deepte van waat oeits water waar de mins ieuwelank haet gegaeve in verbóndenheid mèt mooder aerd um gruuëts op te zien De gerdeneer Ger Deneer

19

20

Vastelaovesoptoch 2004 mótto “Weej zien knap zat “!

21

22

Beej deze, wille weej idderein bedanke veur dae schoeëne vastelaovesoptoch, weej hebbe d’r van genaote !

23

24

Bestuur V.V. de Moeraskwaakers

Wilt geej ouk lid waere

Sjaak Driessen

3 542 658 Veurzitter

van V.V. de Moeraskwaakers ?

Peter Daemen

3 515 549 Sikkertaris

Elly Gruintjes

3 513 266 Penningmeister

veur 15 euro per jaor aan

Sjraar Driessen

3 518 937

kóntribusie ziet geej al lid

Hans Hendrickx

3 512 142

en steunt geej de

Marc Hendrickx

06 - 51 268 757

Theo Thijssen

3 517 182

Det kin neteurlik,

vastelaovend in ‘t Ven ! Meld óg aan beej ein van de bestuursleeje,

Ie-meel: [email protected]

of met ein meeltje nao de sikkertaris !!!

Möpkes….. “As ik einmaol in de VUT zit” zaet Baer taege Wiel, “dan gaon ik in ‘nne schómmelstool zitte en doon ein jaor hielemaol niks”. “En dan”, vruug Wiel. “Dan begin ik langksaam te schómmele”, antwaord Baer. “Dien breeve waere steeds baeter”, zaet de directeur taege zien sikkertaresse. “Binnekort kump d’n daag det weej de ièrste kinne versteure”.

Vense Optoch, ..... zondaag 23 jannewari 2005, motto: Weej gaeve d’r einen drei aan. Leef kwaakers en kwaakerinnekes oèt 't Ven, wat ware weej knap hè. Neet dan? ‘t Is net as of de vastelaovend idder jaor vruùger velt. Kint geej óg dae optoch van vurrig jaor nog veur de geis haole. Det waas d'r eine um gruuëts op te zien. Maar waat ein waer hè, waat ein pokkewaer.‘t Trio en Jeugkwartet kinne dao als gen andere euver meipraote. Weej gaon d’r van oèt det dit einmalig waas en haope dan ouk det geej, groeët en klein, jónk en ald, óg weer opgaef veur d’n optoch van 2005. Want zónder óg kan ‘t neet zoeë waere wie andere jaore. Um de zjurie ein zoeë good meugelik euverzich te gaeve hadde weej gaer det geej de gegaeves op ónderstaond breefke invölt. Dit is gelièk de opgave van de kinder, veur de täöt. Net as vurrig jaor zien d’r waer schoeëne baekers, te winne. Allein det is al ein reeje um mei te trekke. As geej óg neet opgaef en toch mei wilt loupe dan kin det, maar geej krièg dan waal gen nummer en dus ouk gen kans op 'nne priès en de wisseltroffee. Gaer hadde weej det idderein veur woensdaag 19 jannewari ut breefke inlevert beej ein van de leeje van de optochkemissie: John Achten Hay Wijnen Ger Straatman

Middewaeg 56 Boswachterswaeg 6 Gabriëlstraat 2

(077) 3546113 (077) 3512478 (077) 3543626

Aanmelde veur d’n optoch Naam: .........................................................… Adres: ………...................................................................................... Tillefoon: .......................................... (as d'r nog ens vraoge zien) Aantal: groeëte: .........

kinder: ......... (i.v.m. de täöt) E-mail: ................................................

Weej veure oèt: ........................................................................................................................ Aankruutse gaer: o einzelgänger o kleine groep (wies 5 persoeëne) o Jao, weej hebbe zelf mezièk

o groeëte groep

o wage of ker + groep

P.S. Geej kint dit aanmeldingsbreefke ouk kópiëre of euverschriève as geej neet in dit bukske wilt knippe !!!

25

Liès van adverteerders en sponsors die dees oètgaaf meugelik hebbe gemak.

Bedank!!! Agro Centrale BV Autofit Vullings Venlo en Tuinbouwservice Bavaria bier Benders PLUSmarkt Brinkman Brood- en banketbakkerij Jos en José Janssen BTV Bevestigingstechniek Venlo Café De Hazewind Café Feestzaal ’t Ven Café Restaurant Kegelbanen De Krômme Schuuver Custers Venlo BV Dakdekkersbedrijf Bakker Daniëls Recycling DAS Venlo - Roggel (Dutch Archery Specialist) Dienstencentrum van de tuinbouw Doensen Bouwbedrijf en open haarden/kachels Drukkerij Knoops Eetcafé De Strael Egetra internationale expediteurs F. Backus levensmiddelen en visspecialiteiten Felix Verfgroep Financieel Adviesbureau Wim Janssen BV Foto Kino Linders Friture ’t Ven Gasservice Venlo Gaststätte Verbeek Gebr. Driessen Groenten, fruit, aardappelen en eieren Gipmans BV Gipmans-Brüll loonbedrijf VOF J. Hegger H. Hendrickx Hendrikx Orchideeënkwekerij Henk Faassen Doe het zelf centrum Heuts Automaterialen Hondenpension ’t Bölteven Hypotheek Strateeg Installatiebedrijf Wilfred Kessels Janssen-van Bergen Venlo Schildersbedrijf

Jo Reinhoud John Huskes, Joop van den Heuvel VOF K. Spiertz Kassenbouw en –beglazing BV Kellpla Kirsten Hendrickx Klusbedrijf Ger Fitten Kusters Handelsmij. BV Las- en constructiebedrijf Biemans en Kranenbroek L’Avenir Dames- en Herenkapsalon Leurs Tuincentrum LJ Trailer Service M. Vissers Calculatie- en schildersbedrijf Markenstein Automaten BV MGL Systems P.H. Oomen & Zn, Venlo BV Peter Vercoulen Grondbewerkingen Poeliersbedrijf ’t Ven Rabobank Venlo e.o Rivierdael Notarissen Ron Vullings Internationaal transport Venlo BV Saab Noorderpoort Venlo Scheuten Glasgroep Schreurs Olie BV Stalhouderij Herm Oirbans Stinissen Service Taxi en Groepsvervoer Van Bommel Th. De Beer BV Tom’s Carwash Trade Port Trailer Service BV Tweewielers M. Van Vegchel Van Rijn Vastgoed Vervoort, Haas en Lamberts Vossen-Hendrickx BV W. van Elderen BV Weijers Houtreinigers Venlo Vof Wymo Venlo BV

26

Heej had óg advertensie kinne staon ! Neem gerös kóntak op met emus van ós bestuur ! Dan steit volgend jaor óg advertensie ouk in ózze Kwaaker !

27

28