MINGGU TANGGAL 28 PEBRUARI – 05 MARET 2016 (Bahan PA HDS enda i negara Kuba nari)
PA HDS II SI MAN OGEN : Lukas 19:1-10 TEMA : BALI ANAK SI NGALOKEN JESUS TUJUN : Gelah Moria : Meteh perubahen kegeluhen Sakeus si luar biasa kenca jumpa ras Jesus. Ngusih Sakeus i bas keputusenna bagepe perubahen biakna.
METODE PA
: Diskusi
Kata Penaruh. Mesera menukah ngikutken Jesus apai ka arus ngangkai kai si ibelaskenNa. Kususna adi si pake rasionalitas otakta guna ngangkaisa banci labo terantusi tapi adi kinitekenlah si pake pasti kita meteh kai sura-suraNa janah tek man baNa. Pengajaren si ilakokenNa arah erbage perumpaman, kejadin si i sekelewetNa bagepe perjumpanNa ras erbage-bage biak jelma. Kususna jumpa ras kalak Jahudi ntah pe kalak si nterem si erpengakap dirina si bujurna ibandingken ras kalak si ndeher ras Jesus. Bahan PA HDS-ta tahun enda si ipesikap senina ras turangta i negeri Kuba nari nuriken kuga kin biak kalak si banci ngaloken dingen ngikutken Jesus i bas kegeluhenna. La saja arah perukuren tapi pe perbahanen dingen erbage keputusen-keputusen i bas kegeluhenna.
Mpebagesi Pengangkan Kerna Ogen. Sakeus sekalak si bayak, kepala pemungut cuke i Roma. I bas sada wari la ia rukur terjeng duit ras erta-ertana tapi man Jesus. Sanga ibegina Jesus reh dingen bengket ku Jeriko, merincuh kal ia ngidah dingen jumpa rasSa, tapi talu ia ibahan kalak si nterem perban ia gendek emaka bali ras anak-anak, kiam ia ngelebei jelma si nterem dingen inangkihina batang kayu guna ngidah
Jesus. Tuhu perbahanen Sakeus e sitik pe la masuk akal ilakoken sekalak kepala pemungut cuke. Tep-tep wari Sakeus erdalan-dalan i Jeriko, alu paken si mewah amin gendek pe daging kulana, itandai kalak si nterem ia, aminna lit ka nge kalak si rate nembeh man bana tapi la sitik si rate ngena. Ku datas batang ara ia nangkih perban merincuh ngidah ras nandai Jesus, nungkir dingen natap ia, bagi danak-danak, si mbelin kal ‘rasa ingin tahuna’. Payo, ia langa bo pernah jumpa ras Jesus tapi Jesus meteh dingen nandai dirina. Emaka itatap Jesus ku datas batang kayu e, ngerana IA man Sakeus nina “O Sakeus pedasken nusurken! Sabap sendah kesilang ateKu i rumahndu”. Luar biasa, la saja ia sengget sabap Jesus langsung ngerana man bana tapi pe meriah ukurna sabap reh ate Jesus ku rumahna. Bagi anak kitik, la mbue iukurina minter ilakokenna, nusur ia. Bali ras anak kitik, jumpa ras keselamaten, minter patuh man kalak dewasa ngikutken kai nina Jesus alu polos nggit ngaloken kalak si langa itandaina. I bas dampar sideban, kalak si nterem jungut-jungut megi ras ngidah kejadin e, sabap mbelin kal arapenna, ia min ngaloken bagi si ialoken Sakeus e. Teridah dua biak dingen respon secara spontan turah i bas paksa e : a. Kalak si nterem si jungut-jungut, minter ngonggar kerna ise ras uga latarbelakang Sakeus, status ras pendahinna selaku pemungut cuke, icap sebage kalak perdosa. Jesus si akap guru, badia la pantas reh ku rumahna. Sabap Sakeus labo kalak bujur, pantasen iakapna Jesus ku rumah kalak si deban. b. Sakeus, megi sie ijababna alu erbahan sada keputusen, minter turikenna ukurna. Dua hal si jadi responna eme : Setengah ertana iberekenna man kalak musil, diakonia si luar biasa sebage ulih perjumpan ras Dibata. Banci saja sedekah enda pe melumbar kal ia man kalak si musil tapi paksa enda jadi buah kinitekenna. Dikune lit kalak itipuna iulihkenna empat kali lipat. Adi payo ia nipu sedekah enda, setengah i bas ertana nari si tading banci keri guna nggalari mulihken si itipuna e. Alu bage banci ikataken Sakeus kalak bujur, amin statusna sebage pemungut cuke icurigai sebage kalak perdosa. Sebage sekalak pengusaha, si ilakokenna e perbahanen si motu sabap labo lit keuntungenna man usahana adi ia erdiakonia. Tapi si jelas perjumpanna ras Jesus ncidahken dirina situhuna, polos bagi danak-danak, la ia ‘jaga image’ (jaim) selaku kalak bayak dingen bagin petugas pemerintahen Romawi i bas nehi sura-surana njumpai Jesus.
Pengkenaina.
Ngumban kepolosen Sakeus sebage kalak si jumpa dingen ngikutken Jesus, melala kal si arus si perubahi i bas dirinta selaku kalak si tek. a. Ngaloken Jesus, arus mpeturah biak bagi danak-danak, polos dingen tek seh maka la lit kebiarenna i bas erbahan keputusen termasuk makeken erta-ertanta. Perubahen cara rukur pe penting kal, kususna ngidah ertaerta si enggo si pepulung kita, labo guna dirinta saja, anak ras kempunta tapi pe man kalak si perlu. b. La jadi kalak si egois, ngukurken dirina jine tapi sanga lit kesempaten guna ngukurken kalak sideban kususna kalak musil la ipebelinna kepentingen dirina. Enda me si arus ipebelin i bas perukuren kalak i bas erdiakonia, la tanggung i bas nampati. c. Pertobaten, jera jadi sada kunci guna mpehuliken hubungenta subuk ras Dibata bage pe ras kerina manusia, si teridah arah perubahen biakta ku siterulin. Kegeluhen sosial ras diakonianta man kalak si perlu. Bagepe i bas perbahanen ncibalken diri i tengah jabu, sangkep geluh, masyarakat, Gereja bagepe negaranta. d. Keriahen ukur, eme ulih si arus si nanami dingen si bagiken man kalak sideban. Keselamaten si ibereken Jesus e, nandangi rumahna ertina ras isi jabuna. Perlu kal si inget, sekalak si jera banci maba isi jabuna ku bas keselamaten e. Keselamaten e enggo reh dingen seh man banta, mari si nanami perkuah ate Jesus e. Dingen berelah Jesus tading i rumahta genduari seh rasa lalap, la kesilang kentisik saja. I bas pusuhta IA erkuasa.
Diskusi : 1. Perjumpan Jesus ras Sakeus tuhu-tuhu ngubahken kegeluhen Sakeus, i bas pengalamenta kuga kinitekenta man Jesus ngasup ngubahken dirinta, secara pribadi, kegeluhen sosial bagepe etikanta i bas kegeluhen si tep-tep wari? Turikenlah! 2. Turiken biak Sakeus si teridah sebage anak-anak. Kuga pengangkanta maka arus bagi anak-anak gelah banci ngaloken Jesus sebage Juruselamatta. Diskusikenlah !
MINGGU TANGGAL 06 – 12 MARET 2016
SI MAN OGEN : Pengerana 7:23-25 TEMA : AMIN ERRUNGGA TETAP ERLAJAR (NUNUT) TUJUN : Gelah Moria :
METODE PA
Meteh maka i bas proses erlajar (tantangen). Tetap nunut (tekun) i bas erlajar. : Permainen.
lit
runggana
Kata Penaruh. Kitab Pengerana eme salah sada kitab Kepentaren kalak Jahudi. Ajaren kerna kepentaren i bas kitab enda termasuk si perpudina i bas Pustaka Si Badia. Ajaren Kepentaren si metuana eme kitab Kuan-Kuanen si ngajarken kerna uga kepastin (optimisme) kerna kalak si ndalanken Pedah Dibata maka ndatken pasu-pasu. Kepentaren i bas kitab enda ikuhi alu litna kitab kepentaren si peduaken eme Kitab Jop. Kitab enda ngataken maka kalak patuh ras bujur pe banci ngenanami kiniseran. Emaka ajaren kepentaren si perpudina eme kitab Pengerana. Carana ngajar man kalak si ndengkehken ia eme alu nungkun/niksiki kerna kai pe (mempertanyakan segala sesuatu). Si enggo iantusi sedekah enda pe isungkuni gelah idatken kai dage inti (substansi) situhuna. Umpamana i bas kegeluhen kalak si jore geluhna. Nungkun ia i bas kitab enda, kai ertina jore geluh? Emaka bage kita ngoge kitab enda tergejab mis man banta uga bagesna ia rukur kerna kegeluhen enda. Inti ras tampuk teluna kitab kepentaren eme “erkemalangen tetap man Tuhan”.
Mpebagesi Pengangkan Kerna Ogen. Guna seh ku bas pengangkan kerna oraten enda, perlu kal si siksiki ayat enda : a. Ayat 23, kerina enggo ku pergermetken alu kepentarenku (Ind: ‘Kesemuanya ini telah ku uji untuk mencapai hikmat’). I bas bagin pemena ayat enda si idah maka si nulis kitab Pengerana enda “mpergermetken kai pe gelah ndatken kepentaren (hikmat)”. Enggo ibanna pengujin (meneliti). Menguji entah meniliti kerna sada-sada
b.
c.
perkara e perlu waktu ras kerja keras (ketekunan). Jadi, lit i bas ia biak kerja keras (ulet dan gigih) guna ndatken pemeteh. Kai ulihna? Nina, akin ku ayaki kepentaren e reh dauhna ia i bas aku nari. Enda biak kalak erlajar. Akin kalak erlajar reh teridahna man bana kerna pemetehna jine. Emaka kalak si erlajar alu payo memang reh pentarna nge arah erbage penelitin si ibanna. Tapi i bas pusuhna turah sada penggejapen reh buen ka si langa ieteh ras terjababna persoalen si lit. Ayat 24, salah sada si ukurina eme kerna erti nggeluh enda. Mbue turah man bana penungkunen kerna kegeluhen. Payo kal, maka i bas nggeluh enda mbue kal la tersiksiki kita. Engkai maka sangap kegeluhen kalak si labo diatena kerna Dibata ras orat nggeluh enda? Engkai maka banci jadi si la sekolah, ngaturken kalak si enggo sekolah entah ku ja deba. Engkai maka mate nguda kalak bujur. Enda kerina penungkunen-penungkunen si akin iorati akin la si antusi jababna. Emaka nina i bas ayat enda,”mbagessa ia, maka la kita ngasup ngertikenca”. Ayat 25, amin bage pe tetap nge aku erlajar muat pemeteh gelah ndatken kepentaren dingen meteh jabapen kerina penungkunenku. Ertina la ingadikenna erlajar amin lit runggana (tantangen) guna muat pemeteh ndatken kepentaren. I bas cakap Indonesia nina,”Aku tujukan perhatianku untuk memahami, menyelidiki, dan mencari hikmat dan kesimpulan”. Rumus erlajar teridah i jenda e me : La banci ngadi entah medu. La banci ngadi erkiteken lit rungga (tantangen). Memusatken perhatin (fokus pada bidang tertentu). Tujunna eme guna ngangkai (tahu dan memahami) ndatken kepentaren. Kepentaren gunana lebih tepat i bas cakap Indonesia adi terjemahken secara bebas eme : kejahaten e kebodohen, kalak si keras kepala (mekeng) e kalak si la sehsa.
Pengkenaina. Erlajar eme sada proses perdalanen. Erlajar labo banci rempet, meter (instan). Erlajar perlu waktu, perukuren, kesabaren, megermet, nunut (tekun, ulet, gigih). Kalak si rasil eme kalak si ncikep biak si enda. Emaka keberhasilen reh arah “nunut” erlajar. La ngadi amin gia lit runggana. Thomas Alva Edison ngataken maka manusia sukses arah “jenius itu satu persen, kerja keras sembilan puluh sembilan persen”. Ertina maka otak manusia lit nge batasna, tapi arah kerja keras banci idatken ulih si terulin.
Sada biak Moria si man benenken eme murah medu. Melala icubaken Moria erlajar sada-sada dampar ketrampilen. Lenga tamat pe enggo ngadi. Ganti ka ku ketrampilen si deban, langa tamat enggo ka medu. Emaka menaken ngenca lalap, tapi lalap la lit ulihna. Perlu megermet arah kai ndai prinsip erlajar i bas ogenta enda. La banci ngadi entah medu. Kerina perlu waktu ras proses. Fokus ku sada bidang si ate kin ipelajari. Ula padah i bas kerina bidang ateta kita ahlina. Cukup sada saja pe, tapi ula tanggung. Umpamana i bas erdakan, pelajari asa dat nanam si “spesial”. Aku pernah ngerana man Perpulungen Moria ningku, aku tek kal aku maka adi erbinaga nasi goreng aku pasti rasil”. Carana ku pepulung kerina bumbu, ku uji coba ngasa dat resep jitu kerna nasi goreng. Ban cataten lengkap, takaren bumbuna, kualitas bumbuna ras kerinana secara terukur ras terpertanggungjababken. Iban tampilenna si menarik seh maka kalak si reh sikap akapna nanam ras pelayanenta. Guna seh ku je, labo banci rempet tapi arah proses si eteh maka pasti banci. Emaka arah PA enda, iarapken man Moria maka la pernah ngadi erlajar kerna bidang si itekuni amin gia lit runggana. Arah rungga si lit kita terus iperlengkapi Dibata jadi kalak si pentar. Kalak si pentar eme maka ietehna kai silakokenna e lit gunana man bana ras kalak si deban, janah la ia nggit ndalanken si ncedai kegeluhen ras si la ngena ate Dibata.
Permainen. Cubaken i bas PA enda sekalak-sekalak kita, ngataken : gelar, beru, bere-bere, kuta asal. Ibenaken i bas moderator nari. Enggo kenca dung ibelaskenna, sebelah kemuhenna melasken mulihi kerna identitas bagi situriken moderator ndai, jenari petandakenna ka man bana. Dung ia iterusken sebelah kemuhen ka, mulihi nuriken identitas moderator ras sebelah kemuhenna, jenari petandakenna ka man bana. Bage me seterusna ku sebelah kemuhenna seh kari serser si ikut er-PA. Permainen enda gunana eme ngelatih kita gelah megermet kerna megiken informasi, sabap arah megermet megiken informasi me tambah pemeteh. Kalak si mekarus i bas kai pe la banci tambah pemetehna. Pdt. Junus Bangun,MTh.
MINGGU TANGGAL 13 – 19 MARET 2016
SI MAN OGEN : Masmur 90 :1-12 TEMA : NGERGAKEN KESEMPATEN TUJUN : Gelah Moria :
METODE PA
Makeken kesempaten si lit alu mehuli guna erlajar. Jadi Moria si disiplin i bas kai-kai pe. : Evaluasi.
Kata Penaruh. Lit kuan-kuan nina ‘kesempaten la reh dua kali’ emaka pakekenlah kesempaten si lit alu mehuli. Tentuna kuan-kuan enda turah erkiteken megati kal manusia la pentar makeken kesempaten si lit i bas geluhna. Emaka mbelin kal bedana kalak si la pentar makeken kesempaten ras kalak si ndarami kesempaten gelah geluhna reh ulina. Emaka lit ka nge megati belas-belasta, kalak biasa pasti makeken peluang alu mehuli tapi kalak pentar ngasup ngubah tantangen-tantangen si lit jadi kesempaten si luar biasa. Tentuna guna ngelakoken si enda labo bage-bage saja tapi erlajar, megermet, ncubaken, la mbiar gagal amin pe pernah gagal, la e erbahanca ia ngadi tapi tetap lit perjuangenna. Arah bahan PA wari enda iajuk gelah Moria ngasup ngergaken kesempaten si lit alu mehuli. Erlajar arah pengalamen Pemasmur, ngidah kuga kegeluhen i doni enda bage gendekna tapi amin kentisik pe banci mbelin ertina.
Mpebagesi Pengangkan Kerna Ogen. Masmur 90 si jadi oratenta enda bagin si peempatken i bas pengelompoken kitab Masmur janah enda eme pertoton Musa, sekalak suruh-suruhen Dibata si idilo maba bangsa Israel ndarat i Mesir nari nuju taneh Kanaan si ipadanken Tuhan. Kuga Musa ngidah kegeluhen doni enda si tuhu-tuhu ngandalken Tuhan saja. Erlajar kita kerna teks enda arah piga-piga poin i teruh enda. a. Dibata ras manusia, Musa nuriken kerina pengalamen geluhna seh iakukenna maka Dibata kap inganna cicio. Sabap segedang geluhna, ia mbelin i bas istana raja, ndarat i istana nari jadi buronan, seh mimpin bangsa Israel ndarat i Mesir nari mentasi laut merah, padang gurun. Ibas
b.
c.
sie kerina kepe Dibata ngenca ingan cicio la lit sideban. Emaka sope deleng-deleng ras doni ijadiken, IA me Dibata si rasa lalap, amin itepaNa manusia tapi manusia e arus mulih ku asalna ndube, eme abu taneh tapi IA tetap Dibata si erkuasa i bas kegeluhen manusia. Waktu, kepeken waktu Dibata la seri ras waktu manusia. Igambarken pemasmur uga dekahna waktu i bas manusia ibandingken ras paksa Dibata, ibahanna beliganna maka seribu tahun seri ras sada wari paksa Dibata, adina 1.000 tahun : 1 wari kuga adi 70 ntah 80 tahun ngenca geluh manusia e? Emaka iandingkenna geluh manusia : Desken pertukaren jaga malam, si kentisik kal ngenca, gambaren jaga malam. Desken dukut si ertunas, turah dingen terlak erpagi-pagi i bas ben enggo melus. Desken sekali erkumesah kal ngenca geluh manusia. Umur si gendek pedas keri jenari lesap me. Kepeken bage gendekna paksa-paksa doni ras geluh manusia i bas paksa Dibata. Alu bage, ise kin manusia, kuga manusia makeken paksa si seh kal kentisikna e. Pemasmur pe nuriken maka i bas umur si gendek enda pe kesusahen me jadi ayam-ayam geluh. Umur si gendek pedas keri dungna lesap me, lanai erbekas, bage kal ngenca geluh enda. Erlajar, proses erlajar itekanken Musa guna ngangkai kerina si jadi i bas kegeluhen si kentisik, 70 ntah 80 tahun. Guna erlajar ipindona Dibata me si ngajari, jadi guru gelah iangkai dingen ierti manusia kerna uga gendekna umur geluhna. Adi pentar ia, pasti ipakekenna paksa si kentisik e gelah mbelin ertina ras gunana man doni i ja ia nggeluh bagepe man Dibata si nepa ia.
Pengkenaina. Kuga manusia makeken kesempaten si ibere Dibata man bana? Amin pe kesempaten e desken pertukaren jaga malam, desken dukut ntah sekali erkumesah ngenca, labo masalah, tapi si penting kuga kita ngergaken kesempaten nggeluh e. Kuga kita makekenca alu mpertanggungjababken paksa-paksa si lit si ibereken Dibata man banta. Man Pemasmur i bas paksa e tuhu-tuhu ngangkai maka paksa e kentisik dingen ‘fana’. Gelah jadi kalak pentar tentuna arus erlajar, i bas erlajar IA me jadi gurunta. Kerina kejadin i doni enda banci jadi kesempaten si meherga man banta guna erlajar. Ibas kalak jahat, kalak bujur, bayak, musil, kalak sehat, sakit kerina e banci jadi
ingan ras kesempaten erlajar man banta, arah sekolah pengalamen pe kita banci ndatken pemeteh. I bas PA minggu enda, nehi arapen jadi Moria si nggit dingen tutus, salah sada carana eme disiplin. Disiplin i bas erlajar dingen makeken kesempatenkesempaten si reh man banta. Ngergaken kesempaten, tentuna alu makekenca alu mehuli dingen ertanggungjabab man si madasa. Perenungen man banta, kuga kedisiplinenta sedekah enda? I bas erdahin, subuk ku kantor, sekolah (ngajar), erdahin ku juma, erbinaga ras dahin sidebanna, enggo nge kita disiplin? Adi si pergermetken asa pengidahta, piga nge Moria si enggo disiplin i bas makeken paksa, umpamana ku PJJ ras PA, dahin sosial ras guna keluarga? Mari si gargari dirinta. Sibenaken i bas dirinta nari janah si ajarken man anak-anakta pe gelah disiplin menaken kitik-kitik nari.
Evaluasi : 1.
2.
Mari lebe si evaluasi kuga nge enggo pemakenta, kesempaten si lit (reh) man banta, asa si ingetndu, kesempaten kai si pernah reh tapi la ipakekenndu ras si ipakekenndu? Kai ulihna? Cuba ibahanndu kai-kai saja kin kegiaten si pentingna (skala prioritas) i bas sada wari, janah tulisken kai kegiaten si ipelebendu si jadi prioritas. Wari Jam Kegiaten Skala prioritas
Pdt. Suenita Sinulingga,MTh.
MINGGU TANGGAL 20 – 26 MARET 2016
SI MAN OGEN : Pengerana 10:7-10 TEMA : GARUTLAH PEMETEHNDU TUJUN : Gelah Moria : Erlajar desken nggarut sekin seh entelap. Nggit erlajar arah program pembinan si aturken Runggun Gereja bagepe Moria. : Erban Program Kursus.
METODE PA
Kata Penaruh. I bas doni enda labo kai pe lit si tetap. Kai pe ngenanami perubahen i bas tempas entah pe popo si sada nari ku bas tempas si mbaru entah pe sideban. Bali ras pemeteh manusia (ilmu pengetahuan), memang lit si terus menerus berlaku tapi buen si arus ngenanami perubahen ras perkembangen. Perubahen ku si terulin enda me si igelari kemajun. Ulih pemeteh si terus menerus ipelimbarui ntah pe itambahi si banci ipakeken guna kegeluhen manusia igelari modernisasi tuhu-tuhu erbahanca kegeluhen manusia reh sikapna. Pemeteh ras ketrampilen erbahan kai pe arus ipesemal makekenca maka lit gunana man manusia. Pengangkan kerna Kata Dibata pe arus tetap ipebagesi gelah kiniteken reh bagesna. Kai pe siman bahanenta la banci lang perlu kita pemeteh.
Mpebagesi Pengangkan Kerna Ogen. Kitab pengerana eme sada kitab si megati ngataken “sia-sia nge nggeluh enda”. Labo lit ituriken ise kin si nulis kitab enda, tapi adi si pergermetken penulis mbue nuriken aturenna ras makna nggeluh. Erbage-bage usaha ilakoken guna ndatken erti geluh tapi kedungenna kerina sia-sia. Umpamana kalak si pentar ulin asangken kalak lenge, tapi la banci lang maka duana nge pagi ngalaken sada hal si pasti eme kematen (2:13-16). Alu bage pemeteh entahpe kepentaren manusia labo banci nampati kalak sideban guna ngantusi kerna sura-sura Dibata (8:17) sabap IA nge si erbahanca kerinana jadi, guna sie
manusia arus mehamat dingen patuh man Dibata (5:7. 8:12-13). IA nge si jadi hakim i bas kegeluhen (3:17). Pengerana pasal 10 mbue nuriken perbandingen kegeluhen kalak pentar ras kalak bodoh. Kalak pentar teridah arah perbahanenna si ngelakoken kebujuren, janah kalak bodoh perbahanenna ras perdalanna encidahken kerna kebodohenna. Erbage-bage kejahaten kalak bodoh : raja si ngelakoken si la bujur, kalak bodoh naik pangkat janah lit ka suruh-suruhen si arusna erdalan jadi si ngersak kuda janah tuanna si erdalan bagi suruh-suruhen. Benaken ayat 8-9 nuriken kerna ulih perbahanen. Kai sinilakoken e mereken ulih man kegeluhen. Adi lit kalak si engkuruk lubang, banci si ngkuruksa ndai gedap ku bas lubang; adi icedaken tembok rumah, maka kalak ndai banci itagut nipe si erbisa (tembok rumah kalak Israel ibuat i bas batu bata, janah i bas kelang-kelang batu-bata e ibahan kubang/lumpur, dikune kubang e bene/ikurkur maka banci nipe rasar i bassa. Band. Kuan-kuanen 26:27, Masmur 7:15-17). Ngidah ulih kebodohen-kebodohen si lit e, penulis ngajarken gelah pentar alu mpergunaken ukur si jore. Sope denga ndalanken sada dahin, arus kepe leben ibahan rancangenna gelah ula meros entah menggo. Pengkenaina. Sia-sia kegeluhen manusia adi terjeng mpejangjang pemetehna saja. Guna sie penting kal erlajar ngantusi kerna pemere Dibata seh maka manusia e ngaloken sada keriahen i bas nggeluh. Jujur, memang labo kerina banci terantusi kerna perukuren Dibata, tapi si jadi gelemen emekap Dibata si ngaturken ras nentuken masa depan. Erkiteken sie maka iajuk kita tetap nggit erlajar. Erbage-bage cara si ilakoken gelah meteh oratna kalak si erkemalangen man Dibata nggeluhken geluhna i pertibi enda. Adi ateta ngaloken ulih si mehuli ras ngkurangi ngaruh si la mehuli (meminimalisir dampak negative) mbageslah pengukuri kerna dahin-dahin si nandangi idahiken. Rancangen e jadi proses guna ndatken kiniulin. Iandingken bagi sekin ras garut. Gelah erdahin banci meter, la makeken tenaga si mbue kal, ras mereken ulih si mehuli maka arus kepe lit kepentaren ngukurken metode ntah pe cara i bas ndungi dahin e. I je me iperluken kalak si pentar/bijak. Kalak pentar makeken peralaten si lit guna mpesunah dahin e. Igarutna sekinna seh entelap. Nggarut enda me sada proses/sarana. Ulihna sekin si igarut ndai pe entelap, mesunah igunaken erdahin. Kedungenna alu cepat ras tepat dahin e terdungi. Endam cara makeken kepentaren, mereken kiniulin nandangi geluh. Sabap adi la kita pentar, ketadingen me kita.
Kepentaren e labo arah otak saja, tapi arus sendalanen ras kepentaren spiritual/kiniteken. Garutlah kegeluhenta alu litna semangat ibas kita ikut i bas dahin-dahin si banci ningkatken pemeteh, kecerdasen emosi bagepe kinitekenta. Cara-cara bagepe proses enda tujunna gelah banci kita reh beluhna, jadi kalak pentar entah pe erkualitas. Gereja erkualitas, jemaat pe erkualitas. Emaka selaku nande i tengah jabu, aminna melala pe dahinta ula kita nggit ketadingen i bas sibagenda rupana sabap adi reh pentarna kita reh ngasupna kita jadi ingan tertande nandangi isi jabunta.
Erbahan Program Kursus. Moria ibagi i bas dua kelompok besar janah radu ras ngukuri kerna program si banci ilakoken i tengah-tengah Moria guna ningkatken kepentaren Moria alu ngisi kolom i teruh enda. Kenca dung program si ibahan e ipersentasiken ketua ras sekretaris kelompok, persada arih gelah program enda iusulken jadi program Moria Sektor entahpe Runggun. Contohna banci iperdiatekenndu i teruh enda : NO ITEM URAIAN 1 Gelar Program Kursus Managemen Keuangen Keluarga 2 Latar Belakang 1. Moria eme bendahara si ipercayaken guna mengelola perduiten i bas rumah tangga. 2. Pentingna ngaturken perduiten guna ningkatken kesejahtraan rumah tangga. 3 Output (keluaran) Terlitken kebutuhen rumah tangga alu ratur, alu litna pengaturen si mehuli. 4 Outcome (manfaat/guna) Gelah keluarga lebih harmonis ras ndauh arah kebiaren kegeluhen erkiteken perekonomin si la stabil. 5 Impact (dampak/ulih) Moria ngasup ngaturken perduiten gelah la ndabuh ku bas sikap ‘konsumerisme’ ras perduiten pe banci iaturken. 6 Indikator keberhasilan 1. Moria ngasup erban daftar
7 8
Bentuk Kegiatan Si arus ilakoken
9 10 11 12 13 14
Jumlah peserta Ingan Waktu Penanggung Jawab Anggaran Sumber Pemasukan
pemasuken (uang masuk) ras daftar pengeluaren (uang keluar). 2. Moria ngasup menentuken keperlun si penting ras prioritas. Kursus 1. Mempersiapken acara si menarik (games si erkawiten ras kursus guna nambahi minat i bas kursus). 2. Ngundang Moria sebage peserta kursus. 3. Ngelitken pembicara si erkompeten. + 50 orang Gedung serba guna, Gereja Bulan Juni 2016 Seksi Persekutuan Moria Runggun Rp. 2.500.000 Kontribusi peserta Rp. 30.000,-/ kalak, subsidi Moria Runggun Rp 1.000.000,-
Bahanlah programndu i teruh enda, bagi Moria i bas piga-piga kelompok. NO ITEM URAIAN 1 Nama Program 2 Latar Belakang
3
Output (keluaran)
4
Outcome (manfaat/guna)
5
Impact (dampak/ulih)
6
Indikator keberhasilan
7
Bentuk Kegiatan
8
Si arus ilakoken
9 10 11 12 13
Jumlah peserta Ingan Waktu Penanggung Jawab Anggaran
14
Sumber Pemasuken
Pdt. Rosani Sembiring,STh.
Jika anda tidak ingin belajar, tak seorang pun yang akan menolong anda. Sebaliknya jika anda memutuskan untuk belajar, tak seorang pun yang mampu menghentiikan anda
MINGGU TANGGAL 27 MARET – 02 APRIL 2016 SI MAN OGEN : Kuan-kuanen 30 :24-28 TEMA : ERLAJARLAH ARAH SEKELEWETTA TUJUN : Gelah Moria :
METODE PA
Nuriken pelajaren si idatna arah tinepa Dibata. Makeken pelajaren si idatna arah sekelewetna (internet, baca buku). : Erlajar arah rubia-rubia.
Kata Penaruh. Doni enda ras isina itepa Dibata alu mehuli, emaka kerina tinepa e erguna sada nandangi sidebanna. Manusia si itepa dingen ibere tanggungjabab guna mpekena-kena tinepa sideban eme makhluk si rukur, si banci reh belinna i bas kai pe subuk si mehuli bagepe si la uli. Ertina arah kerina tinepa enda banci jadi ingan manusia erlajar i bas kegeluhenna. Sinuan-sinuan ras rubia-rubia megati kal jadi andingen kuga arus manusia nggeluh gelah ia ngasup ersada bagepe singgur ras lingkungenna gelah reh ulina, alu ngusih biak ntah pe nilai-nilai si lit i bas kegeluhen. Melala kal ingan manusia erlajar i bas kegeluhenna, subuk arah persekolahen ntah pe pendidiken siniaturken i bas negeranta si banci ndatken kelulusen (pendidiken formal). Banci ka pe erlajar arah pengalamen nggeluh ras arah sekelewetta (pendidiken non formal) arah sie me manusia erlajar segedang geluhna. Umpamana arah erlajar si sada eme uga mpraktekkensa (otodidak) ntah pe erlajar arah biak manusia si mehuli ras si la mehuli, bage pe erlajar arah biak rubia-rubia ras sinuan-sinuan. Wari enda arah bahan PA-nta kita iajuk erlajar arah sekelewetta, kai pe si lit i lingkungenta banci nambahi pengalamen ras pemeteh man banta.
Mpebagesi Pengangkan Kerna Ogen. Kitab Kuan-kuanen melala kal ngajari kita kerna erti nggeluh alu erbage pedah-pedah guna nampati mbuka cara rukur manusia. Si Agur nehken rananna kerna erbage-bage rubia-rubia. Arah teks enda ibabai manusia gelah banci reh pentarna alu erlajar kerna biak rubia-rubia. Penulis ngidah maka rubia-rubia enda cukup cerdik.
a. Perkis : nikapken nakan paksa musim perlego, ia itandai selaku rubia-rubia si labo megegeh, kitik tapi itandaina bana. I bas kecibalna e erlajar ia guna ngaturken situasina gelah tercukupi keperlunna seh maka la ia ketunduken i bas ngelitken panganna. Arah cara enda pe manusia banci erlajar man perkis (Kuan-kuanen 6:6), ketutusen, ketekunen, semangat gotong royongna si banci iusih. Sabap labo kai pe ia adi si sada ngenca. b. Bangsa Menci, erbahan lubangna i bas ling-ling batu amin gia labo rubiarubia si la megegeh. Guna ngelubangi batu arus pake alat si megegeh ras iusur-usur, menci si la megegeh pe ngelubangi batu erdandanken lit ketutusen ras semangat si tetap. c. Labang banci erbaris alu ratur amin labo lit rajana (pemimpin) si ngaturkenca. Tentu lit i bas ia kesabaren, ukur meteruk ras kengasupen ngaturken bana maka banci ia erbaris alu ratur. Labo ia si asak-asaken, erlumba arah lebe ras si gegeh-gegehen. d. Cikcak eme rubia si lemah tapi ringan i bas istana raja, i bas ia nangkap panganna (rengit) ia cukup teneng, sabar ras penuh perhitungen (la mejarjar). Eme si man pelajaren i bas cikcak nari. Adi si perdiateken apai nge kita cerdiken, kita selaku manusia si itepa Dibata alu kepentaren, asangken rubia-rubia si empat ndai? Melala kal peran lingkungen (alam) si erbahansa ia reh pentarna. Ngasup ia ngubahken tantangen jadi peluang i bas geluhna.
Pengkenaina. Adi si bandingken dirinta ras rubia-rubia enda ndai, ija nge tadingta. Kita manusia si ibere Dibata kengasupen rukur, daging si mbelin, otak si pentar ras banci terus erlajar. Pelajaren si banci sidatken la saja arah rubia-rubia enda ndai tapi arah erbage perkembangen pemeteh paksa enda. Tapi megati peluang si lit sekelewetta e la si pakeken bagi arusna, langa tepat si pake erbage peluang enda ndai. Umpamana : manusia banci erlajar arah ngoge buku, tapi adi isungkun kita piga nge kita si nai paksa sekolah rajin ku perpustakan guna ngoge? Salah sada kekurangen masyarakatta eme kurang kininggiten ngoge, pemeteh kai pe banci si dat arah internet nari tapi teremen manusia si make internet enda guna media sosial saja : er-facebook, ngenen model baju ntah belanja online saja, riahen ras semangaten kita nggunakenca hal-hal si bage rupana. Arah nonton televisi, umpamana nonton Kick Andi : si banci si dat pelajaren arah sie eme : anem gia labo kita jumpa ras kalak si sukses tapi turah semangat i bas ngidah kegigihen sesekalak arah perjuangen geluhna.
Adi erlajar arah rubia-rubia ndai, banci melala kal biak-biakta si terpekena gelah reh ulina. Kuga kita erlajar setia arah kegeluhen biang, kesetian dingen ketulusen bagepe kiniteruken ukur arah biang, rajawali arah gegeh dingen semangatna. Tentuna kerina hal si lit i sekelewetta banci si pake guna njemba kita gelah reh ulina.
Erlajar Arah Rubia-Rubia. 1. Mari suratken rubia-rubia si lit i sekelewetta si banci si pelajari erbage biak si mehuli i bas ia nari. No Gambar Biak/kecibal Si banci ipelajari Biang 1 Setia Jadi kalak setia
2
Kepompong
3
Rajawali
4
Perkis
5
Nderapati
2. Cuba turiken, kai si menarikna kal man bandu i bas rubia-rubia si lit dingen kai ka tekadndu kenca ipelajarindu. Turikenlah! Pdt. Suenita Sinulingga,MTh.
Dari air kita belajar ketenangan. Dari batu kita belajar ketegaran. Dari tanah kita belajar kehidupan. Dari kupu-kupu kita belajar merubah diri. Dari padi kita belajar rendah hati. Dari Tuhan kita belajar tentang kasih sayang yang sempurna. Melihat ke atas : memperoleh semangat untuk maju. Melihat ke bawah: bersyukur atas semua yang ada. Melihat ke samping: semangat kebersamaan. Melihat ke belakang: sebagai pengalaman berharga. Melihat ke dalam: untuk introspeksi. Melihat ke depan: untuk menjadi lebih baik (Fil 4:8)
