MINGGU TANGGAL 07 – 13 PEBRUARI 2016
SI MAN OGEN : Jop 23:1-5 TEMA : MESIKEL NDATKEN KEPENTAREN TUJUN : Gelah Moria :
METODE PA
Nuriken kesikelen Jop i bas ndarami jabab perbebenna. Mesikel erlajar guna ndarami jabab i bas kerina perbeben geluhna. : Tanggapan Lingkaran.
Kata Penaruh. Salah sada asam nggeluh si mbelinna eme kap kepentaren (hikmat). Janah guna ndatken kepentaren enda perlu kal metenget sabap dikune la bas uluna nari, kepentaren e si pindo labo reh sikapna dingen tenengna geluhta. Dibata me ulu kepentaren emaka Dibata pe mekatep ikataken ‘Dibata Kepentaren’ (Allah yang Sopia). Alu kepentarenNa itepaNa doni enda ras kerina isina, emaka la lit si kurangna, kuh kerina dingen serta. Bage me pe i bas perdalanen geluh manusia, kepentaren banci naluken kerina perbeben geluh. Alu kepentaren si rehna i bas Dibata nari, ngasup kita ngangkai kerna kai pe si jadi. Emaka marilah si darami KEPENTAREN e, alu erlajar kita arah pengalamen Job i bas ngalaken kerina kiniseranna, seh kedungenna ia banci menang, janah sepuluh kali lipat Dibata mereken kai si enggo bene i bas ia nari.
Mpebagesi Pengangkan Kerna Ogen. Kitab Jop 23:1-5 eme sada bagin i bas jabab si isehken Job man temanna Elipas si la tetap ukurna er-Dibata, ngidah bage buena situasi si la mehuli, perbeben, kiniseran i sekelewetna. Bage pe ngidah kinata kegeluhen Jop si dem alu kiniseran si mesangat. Situhuna sedar kal nge Jop kerna kiniseran si inanamina, tapi i bas ngalakenca, lit piga-piga hal si iturikenna, eme : - Ayat 1,2 ituriken Jop maka ilawan ras ijungutina Dibata, erdandanken lanai tertahanna perbeben e seh ndehereng pe ia, ertina Jop la nggit nadingken Dibata erdandanken kecibalna, kiniseranna. Tapi ngerana ia, la ipejang-
jangna ukurna. I jenda teridah uga ia ngerana man Dibata, ibukakenna kerina si lit i bas pusuhna man Dibata. Arah carana ngerana teridah maka ndeher kal ia ras Dibata, bagi temanna, Dibata jadi inganna nuriken isi pusuhna (ingan curhat). - Ayat 3-4, i jenda iturikenna uga belinna sura-surana guna jumpa ras Dibata, gelah iturikenna perkarana ras kebujurenna. Arah katana enda teridah, Jop nggejabken maka Dibata ngenca ngasup megiken ia, ngangkai (memahami) ia, jadi la lit iakapna teman si cocok seakatan Dibata ngenca, bicara lit gia rusur temanna reh guna nemani ras ngapuli ia. - Ayat 5, ituriken Job mulihi uga belinna sura-surana guna ngaloken jabab penungkunenna man Dibata, merincuh kal Jop megiken Kata Dibata dingen ninggelkenca. Sabap kerina si jadi i bas ia e, tetap tersungkunsungkun i bas pusuhna, kerna kai erti si jadi e, kai erti kiniseranna. La iakapna kiniseran e jadi bage-bage saja, tapi kerinana lit ertina. Tapi la lit ise pe si ngasup njababsa, bicara ijabab Elipas pe la kena ku pusuhna, labo teralokenna, sabap jabap i bas Dibata nari ngenca si payo, emaka e ngenca ngasup ia ngalokenca. Arah kai si ituriken i datas teridah maka rincuhen Jop ndatken kepentaren gelah iangkana kai si jadi i bas ia asangken serpang pulah i bas perbebenna nari. Sabap labo ikatakenna gelah sehat ia, tambah rejekina, mehuli min ndeharana ras sidebanna. Tapi jumpa atena ras Dibata iturikenna kerina perbebenna janah ndatken jabab i bas Dibata nari. I bas si enda teridah maka tek Jop, i bas kepentaren Dibata, ngasup ia ngangkai kai erti kerina si jadi i bas geluhna, erlajar ia kerna kepentaren janah enda me si pentingna man bana emaka idaramina, iayakina pe.
Pengkenaina Adi si oge kerina isi Kitab Jop, teridah maka mbelin kal gegeh Jop i bas ngalaken kiniseranna, seh ia ku ujungna dingen ndatken kemalemen ate ras upah i bas Dibata nari. Kerina enda jadi erdandanken idaramina kepentaren janah i bas kepentaren idatna jababna, maka e jadi gegehna ndalanisa. Pengalamen Jop, jadi penjemba man banta i bas ndalani kegeluhen i tengah doni si dem alu kiniseran enda. Sabap labo lit manusia si teran nandangi kiniseran ras perbeben nari. “Ula tangisi perbeben ras kiniseran si jadi i bas kegeluhen enda, tapi ayakilah, mesikellah nandangi kepentaren si jadi tambar ras gegehta”. Darami ras pindolah kepentaren e i bas Si madasa nari eme Dibata. Sabap uga pa pe beratna ras belinna kiniseran e, ngasup kita ngalakenca. Kepentaren ndeher ras ukur (perasan) manusia, malem ate, meriah, gulut ras
sidebanna, kerina enda lit i bas ukur ras perasan manusia. Janah kepentaren pe lit i bas ukur manusia, emaka adi ukur (perasan) idemi alu kepentaren maka la lit perbeben si ngasup mabai kita ku kebenen, sabap i bas kepentaren, ijelasina man banta kai erti kiniseran e. Emaka i bas ngenanami kiniseran, perlu kal si pebelin pusuh si mesikel ndatken kepentaren, gelah iangka kai erti kerina si jadi. Janah adi nggeluh i bas kepentaren Dibata tentu idatken jababna. Ibas sie la lit perbeben (kiniseran) si mabai kita ku kebenen, tapi kenca kiniseran e turah me kemalemen ate. Janah kerina enda banci teraloken kita adi si dalani alu kepentaren. Melala pengalamen geluh si ibentasi kita, subuk kesenangen entah pe perbeben, i bas sie jadikenlah tep-tep situasi jadi inganta erlajar kerna surasura Dibata. Jadi inganta erlajar guna nandai dirinta bage pe nandai Dibata alu mbages. Alu bage i bas kerina dampar geluhta jadi kesaksin si nggeluh nandangi sekelewetta.
Tanggapen Lingkaran. Moria ibagi i bas piga-piga kelompok sue ras buena si reh. Janah tep-tep kelompok 2-3 kalak. a. I bas kelompok, alu ergiliren Moria nuriken 1 pengalamen kiniseranna. b. Anggota kelompok ergiliren nampati alu nuriken penggejapenna erpalasken kepentaren Dibata guna ngeteh sura-suraNa. c. Kenca kerina anggota kelompok nuriken kiniseranna janah anggota kelompok nampatisa, tep-tep kalak naksiken penggejapenna. d. Jadikenlah cara si bagenda jadi kebiasanta i bas ngalaken kiniseran i bas kegeluhen enda. e. Kelompok itutup alu pertoton. Pdt. Jennie E.Keliat,STh.
MINGGU TANGGAL 14 – 20 PEBRUARI 2016
SI MAN OGEN : Kuan-kuanen 14:6-9 TEMA : NGGIT ERLAJAR TUJUN : Gelah Moria :
METODE PA
Terus erlajar guna ndatken kepentaren. Ngembangken kepentarenna guna kiniulin geluhna ras kerina jelma. : Rekoleksi
Kata Penaruh. Erlajar segedang geluh, em prinsip kalak si nggit maju. Lenga akapna bias pemeteh si enggo idatkenna sedekah ia erlajar i bas pendidiken si resmi (formal). Sabap melala si lenga iangkana amin pe ia enggo tamat i bas persekolahen. Kalak si nggit erlajar e me kalak si meteruk rukur, tehna i ja nari ia itepa, ras ku ja pagi kedungenna geluhna. Ia itepa i bas abu taneh nari janah mulih ka pagi ku taneh. Sope mulih ku taneh, melala proses si man bentasen, i bas ndalani proses e la banci lang arus terus erlajar. Situasi si man bentasen wari-lepas wari lit lalap perubahenna, la seri cara ngalaken situasi tahun enda ras situasi tahun si reh. Kalak si nggit erlajar ia me ikataken kalak pentar (bijaksana, sofia, hokma). Ras ise pe ia nggit erlajar, anak kitik pe temanna, banci ia erlajar i bas anak kitik e nari. Kai pe si idahna arah e banci nambahi pemetehna, banci ia erlajar i je nari. Kalak pentar terus menerus ndarami pemeteh.
Mpebagesi pengangkan kerna ogen. Arah oratenta enda kita ibabai ndarami pemeteh alu ngenen perbandingen kalak motu ras kalak pentar. Kalak motu ituriken i bas ayat 6a : kalak si meganjang ukur, ayat 7 la lit kai pe si banci iajarkenna, ayat 8a : lenge, kalak bodoh, ayat 9a : la diatena pe adi ia erbahan dosa. Arah ayat-ayat enda kita erlajar maka kalak bodoh daramina kepentaren tapi sia-sia, labo kai pe datsa, sabap i bas dirina lit biak meganjang ukur, la akapna perlu pemeteh kalak si deban sabap beluhen akapna ia asangken kalak sideban. Si mekelekna la ia mbiar man Dibata, la ukurna kutera pe adi ia erdosa. Sebalikna kalak pentar e me kalak si lit ukurna (ayat 6b) : ietehna kai si ibahanna, (ayat 8b) : mesikel ia dosana ialemi (ayat 9b). Kalak pentar e la saja merincuh erlajar ras ndatken
pemeteh tapi pe ia nggit ipesikap arah pemeteh e. Kenca ia erlajar, isiksikina dirina arah pengajaren si datkenna nggit ia mperobahi diri. Emaka pemeteh e enggo jadi sekerajangenna. Ipersingeti pe gelah ula nggit ndeher ras kalak motu, ula erkandu-kandu (bergaul intim) ras ia, labo perlu melala waktunta ercakap-cakap ras ia sabap ia labo merhat ngaloken pengajaren, entah kata persinget, nembeh atena adi iajarken. Kata-kata si payo, si mehuli ras adil la lit bas ia. Kalak si rembak ras ia banci saja salih bagi ia. Tapi adi rembak ras kalak pentar melala untungna man banta. Sabap kalak pentar ietehna kai si ibahanna, labo saja beluh ngerana alu mehuli, bujur, benar, ras adil tapi pe beluh ertimbang ras muat keputusen. Adi idalankenna si bujur kai ulihna man bana ras man kalak si deban, bage pe sebalikna adi dalankenna si jahat kai ka ulihna man bana ras man kalak si deban. Tentu alu bage ulih si mehuli man bana ras man kalak sideban banci idalankenna i bas geluhna. Pengajaren si banci dat arah kalak motu enda ndai eme kap; ia labo terjeng motu ngenca, tapi pe jahat, la ia nggit nehken perubahen guna pengalemi dosa, sabap labo iakapna lit salahna (mekeng) emaka labo iakapna perlu pengalemi dosa i bas Dibata nari. Pengajaren arah kalak pentar eme; merincuh kal ia ndatken pengajaren, adi ietehna perbahanenna e salah minter kal ia ndarami dalan gelah ialemi. Iakukenna kesalahen e i lebe-lebe Dibata emaka ia ndatken pengalemi dosa.
Pengkenaina. Arah dua biak ukur si pentar mpengaruhi cara rukur si mehuli si enggo si pelajari enda ndai iarapken maka kita pe jadi kalak pentar, meteh kai arus si bahan. Tetap nggit erlajar ras niksiki diri gelah banci reh ulina pendalankenta pemeteh e wari lepas wari. Pemeteh si enggo lit bas kita perlu si kembangken, gelah la terjeng man banta ngenca ulihna tapi pe erguna man enterem jelma. Tole nari kita banci erlajar labo arah jelma ngenca, tapi banci kange erlajar arah sekelewetta, entah e rubia-rubia ras biakna, janah kai si banci si usih arah biakna e nari. Banci ka kita erlajar arah sinuan-sinuan, kai gunana sinuan-sinuan e banta, arah kalak sideban kerna biak ras pengkebetna e kita erlajar, enggo nge kita enda lit gunana man kalak si deban entah lenga. Jadi erlajar e banci arah kerina situasi, ras keadan geluhta. Kalak pentar tetap nggit erlajar. Nggit jadi kalak pentar......???? Erlajarlah..!!!!!!
Rekoleksi.
(Nginget mulihi paksa si enggo lepas alu ngerenungkenca dingen seh ku bas sura-sura mpehulikenca guna kegeluhen si lebih mehuli). Moria bengket ku bas paksa teneng, asa bancina iiringi musik si lembut. Pemimpin PA ngajuk ras mabai peserta PA nginget paksa-paksa dirina la jadi kalak pentar i bas erbahan keputusen. La metenget, la erlajar ku sekelewet. Kenca e mari si inget kai ulihna. Kai-kai saja kegagalen si dat kita erkiteken la kita nggit erlajar. Kenca nginget sie, kai arapen ras sura-sura i bas wari si reh enda, ntah tekadndu gelah banci reh pentarna. Umpamana : nggit erlajar, megiken kata, la meros. Ajuk Moria ertoto i bas pusuhna sekalak-sekalak gelah ia jadi Moria si nggit erlajar segedang geluhna. Pdt. Nurbety br Ginting,MTh.
Orang hebat tidak dihasilkan melalui kemudahan, kesenangan dan ketenangan, tetapi mereka di bentuk melalui kesukaran, tantangan dan air mata (Ibrani 11:23-29). Jangan menyerah sewaktu kita merasa seakan semua sulit untuk kita jalani, percayalah bahwa TUHAN akan memberikan kemampuan kepada kita untuk menjalaninya. Bersama Tuhan Yesus kita menjadi orang yang hebat, lebih dari pemenang.
MINGGU TANGGAL 21 - 27 PEBRUARI 2016 (Bahan PA HDS enda i negara Kuba nari)
PA HDS I SI MAN OGEN : Markus 10:13-16
TEMA TUJUN
METODE PA
: ALOKENLAH ANAK - ANAK BAGI AKU NGALOKEN ANAK - ANAK E : Gelah Moria : Ngasup ngaloken anak-anak e bagi Jesus ngalokensa. Ngergai anak-anak ras ndampingisa gelah jadi pasupasu bas kegeluhenna. : Diskusi.
Kata Penaruh. Ninta maka i bas kegeluhenta, anak-anak si akap si mehergana, anak eme kebayakenta. Emaka adi enggo ndekah erjabu, lenga ndatken tuah, kuja pe nggit kita ertambar, ku dokter, bidan, si beluh ngaluni ras ku jape si ikataken kalak pasti mengayak kita ndahisa gelah ndatken tuah. Tapi kenca lit anak maun-maun labo lit waktunta pe ras ia, menaken terang seh ngasa berngi kita erbintuas erdahin, emaka lanai lit waktuta jumpa ras anak-anakta. Si pediat ia reh galangna ras kalak sideban gelah banci kita erdahin la terganggu, payo alasenta guna encariken keperlunna, gelah lit dingen nikapken masa depanna. Lit si arus si inget dingen si pebelin i bas pusuhta, kerina si lit i bas kegeluhenta, subuk pendahin, bagepe kinilitenta banci si gantiken, tapi selaku nande la kap banci ise pe nggantikensa. Ngasa ndigan pe kita nge nande nandangi anak-anakta e, labo banci igantiken kalak sideban.
Mpebagesi Pengangkan Kerna Ogen. Enterem pernanden kalak Jahudi mesikel kal gelah anakna ndatken pasu-pasu i bas ‘Rabbi” si ihamati, ras itandai kalak. Emaka i bas umur anakna 1 tahun enggo reh ia ndahi Jesus gelah ipasu-pasu anak-anakna e kerina. I bas paksa sie Jesus lanai ndekahsa isalibken, ngalaken perbeben si mberat. Jelas kal enggo ieteh Jesus maka sie pasti nge ibentasiNa, tapi bage gia lit denga nge waktuNa ras danak-danak, idakepNa anak-anak si itaruhken orangtuana man BaNa. Jesus tetap ngelai kerina jelma, alu la ngenen ise ras kuga geluhna, tapi sinilakokenNa eme IA mediate man kalak sideban. Emaka ugapa pe sibukna tetap nge lit waktuNa guna kalak sideban. Paksa orangtua reh ndahi Jesus maba anak-anakna, irawai ajar-ajarNa kalak si enterem, situhuna labo erkiteken la ieteh ajar-ajar enda sopan santun, tapi atena njagai Jesus gelah ula
terganggu. Ietehna maka waktu Jesus seh kal ergana, ula ibuang-buang waktu e man danak-danak si kitik enda kerina, emaka itegorna orangtua si maba danak-danak e. Nina Jesus, ‘ula olangi anak-anak e reh man bangKu’ ise si bagi anak-anak enda me si ndatken kinirajan surga, kai sinikataken Jesus enda : IidahNa maka ibas anak-anak enda lit kiniteruken ukur, sabap lenga bo lit iukurkenna kerna erga diri ras kiniganjangen ukur. Lit kesetian i bas anak-anak enda, ras tutus adi iarahken ku bas si mehuli. Tek ia man kalak seh maka iakapna orangtuana tetap benar, ia nggeluh i bas keyakinen. Banci ia erteman ras ise pe, anem gia mbaru denga ia jumpa, murah beradaptasi. Lit sifat ngelupaken, la lit elem-elem i bas dirina anem gia ia iperlakoken la adil. Emaka nina Jesus kalak si lit i bas ia perukuren bagi anak-anak enda, ia me sindatken kinirajan surga. Nilai sinibereken Jesus kerna anak-anak e labo tanggung-tanggung, perukuren si bage me si ndatken kinirajan surga. Kepolosen anak-anak si la melala taki pacikna, si julus-julus saja kin ngenca perukurenna, bage min iarapken i bas kita ngikutken Jesus. La terjeng itegor Jesus ajar-ajarNa, tapi pe idakepNa anak-anak e dingen ipasu-pasuNa pe. Jesus ngelakoken sie erkiteken erburak-burak i bas pusuhNa pasu-pasu, ija anak-anak e pe hakna ndatken pasu-pasu e. La terjeng man kalak si mbelin ras dewasa saja ngenca pasu-pasu e, tapi man kerina jelma, termasuk anak si kitik pe.
Pengkenaina. “Anak-anak peniru nomor satu tercepat di dunia”, enda me sinikataken kerna anak-anak. Kai silakoken kita, alu la ngenen mehuli ras la mehuli, payo ras la payo, maka anak-anak e menukah kal akapna ngikutkensa, ngusih-ngusihsa. Kita selaku orangtua i bas pebelin-belin anakta, banci min si aturken waktunta guna ndampingisa, ula min dekahen anak-anakta e itemani internet, televisi ras pembantu si erdahin i bas rumahta. Berekenlah pikiren, perasan ras perhatinta nandangi anak-anakta, gelah banci anak-anakta e reh belinna, la saja daging kula tapi perukurenna, kepentarenna tambah bage pe kinitekenna dingen pengkebetna bagi si ngena ate Dibata ras banci pe jadi pasu-pasu man kalak si deban. Si ergailah pendapat anak-anakta, adi iberekenna pendapatna, gelah ia pe meherga iakapna man bana sabap ia pe iergai. Perlu kal man
anakta e ‘sentuhen’ arah kita orangtuana, sabap e mereken pergegeh ‘penguatan’ man bana. Berekenlah pasu-pasu man bana, alu namaken tanta i datas takalna tupung ia lawes sekolah janah ninta “ Tuhan simasu-masu kam nakku”, kai sinilakoken kita e banci erbahansa ia pe tambah kemalemen atena. Dua kali kita ngelakoken PA HDS, uga kita ngumban biak kepolosen ras kesetian i bas diri anakta bagelah min kita i bas ngikutken Jesus Kristus segedang geluhta.
Diskusi : 1. 2. 3.
Engkai maka ajar-ajar ngelarang orangtua maba anakna ndatken pasupasu ibas Jesus nari ? Enggo nge si ergai anak-anakta, bagi Jesus enggo ngergai anak-anak? Pengajaren si kuga nge si perlu si lakoken nandangi anak-anakta genduari enda?
Berdoa : membuat dirimu kuat. Murah hati : membuat dirimu diberkati. Gembira : membuat dirimu sehat. Sabar : membuat dirimu bijak. Lemah lembut : membuat dirimu dikagumi. Setia : membuat dirimu dicintai. Mengasihi : membuat dirimu mengerti arti kehidupan.