2:11 Sabap enggo ipetangkas Dibata lias atena guna keselamaten kerina manusia

suplemen PJJ 9-15 Pebruari 2014 Written by Pdt. Alexander. S Friday, 07 February 2014 13:31

Suplemen PJJ 9-15 peb 2013

Bahan : Titus 2:11-15

Thema : Identitas Kalak Kristen”

Tujuan :

- Gelah ngawan perpulungen nandai dirina enggo ipilih selaku sikerajangen Dibata. - Gelah ngawan perpulungen ncidahken tanda-tanda dirina (identitas) selaku sikerajangen Dibata

Titus 2:11-15

2:11 Sabap enggo ipetangkas Dibata lias ateNa guna keselamaten kerina manusia.

2:12 Lias ateNa e ngajari kita nadingken kegeluhen si la ngena Dibata ras sura-sura doni, gelah nggeluh kita ngkuasai dirinta, bujur dingen si sembah Dibata alu kegeluhenta i doni enda.

2:13 Genduari kita paksa nimai Wari kemalemen ate si iarapken kita e me kerehen sinalsal Dibatanta si Mbelin ras si Engkelini kita Jesus Kristus.

1/5


2:14 Enggo iendeskenNa diriNa guna kita, lako nebusi kita i bas kerina si jahat nari, jenari ibahanNa kita jadi sikerajangenNa, jadi bangsa si bersih, si mesikel erbahan mehuli.

2:15 Ajarkenlah si enda kerina, janah pakelah kerina kuasandu i bas kam ngajuk dingen mandang kalak. Ola pelepas kalak mapas man bandu.

Lit sada film action judulna “Who Am I” sinuriken sekalak si lanai ingetna ise ia erkiteken sada kecelakaan ibas tugasna. Simenarik ibas sie eme perjuangen aktor e guna ndatken ras meteh ise situhuna ia, erbage upaya ibahanna gelah banci ietehna ise ia. Bagem ergana identitas ibas kegeluhen enda guna meteh ras nandai ise situhuna kita. Ibas sieteh ras sitandai ise kita maka arusna sidalani kegeluhenta sue ras identitasta. Bahan PJJ sekalenda ngingetken kita kerna ergana identitasta selaku kalak Kristen, sijadi sikerajangen Dibata si arusna ncidahken identitas e ibas perdalanen kegeluhenta.

Sienda tentu perlu kel siertiken alu payo segelah reh semangatna kita guna ncidahken keberadanta selaku anak Dibata (Identitas Kristen). Tergejap man banta ibas kinata kegeluhen ibas jamanta gundari megati kel identitas Kristen e enggo samar (bagi lanai teridah), gia melala singelakoken peribadahan tapi ibas praktek nggeluh lanai teridah tandana kita kalak sierkiniteken. Iarapken maka ibas kita ngorati bahan PJJ Minggu enda reh teridahna min kwalitasta selaku anak DIbata alu ncidahken identitas selaku anak Dibata ibas kerina situasi kegeluhen enda.

Titus 2:11-15

Surat enda ipeseh Paulus man Titus I Pulau Kreta guna ngingetken, mpegegehi bagepe kai arus ibahan Titus ibas mpekena/mpejore perpulungen I Pulau Kreta. Keberadaan pulau Kreta

2/5


enterem kalak si jahat emaka Titus arus muat pemimpin sipayo, bagepe uga arusna cara ngajar man perpulungen si lit terpuk-terpukna : metua, nguda, orang tua, anak bagepe seh ku budak. Sie kerina guna banci ngajari uga arusna lagu langkah kalak Kristen : lit kemalemen ate, nggit erteman, la ernembeh ate man kalak, la sijabapen ntah erbelah ibas perpulungen.

Ibas Titus 2:11-15 icidahken kerna Pengajaren ise Dibata sienggo ncidahken lias ateNa man kerina manusia (ay. 11) si banci iertiken maka Dibata tetap teridah selaku Dibata si universal ibas nehken keleng ate. Ugapa pe keberadanta Tuhan tetap hadir guna ncidahken lias ate simbelin segelah manusia e ndatken kemalemen ate. Guna sie maka manusia ibas nggejapken lias ate Dibata arus lit :

- Perubahen diri : nadingken kegeluhen si la ngena ate Dibata bagepe sura-sura doni.

- Nggeluh ngkuasai diri

- Bujur nggeluh

- Sembah Dibata ibas kegeluhenta

Sienda icidahken Paulus guna banci teridah kegeluhen selaku kalak si enggo icidahken Dibata man banta lias ateNa ibas diri Yesus Kristus sireh guna mabai kita kubas keselamaten ras kemalemen ate. La terjeng sie, kesetian nggeluh selaku anak Dibata mabai kita ndatken kemalemen ate ibas kegeluhen enda bagepe kerehenNa si peduakaliken ibas ncidahken kemulianNa man banta. Arah sienda me kalak sierkiniteken e arus tetap nggeluh selaku sikerajangen Dibata alu nggeluh bersih ras mesikel ngelakoken simehuli ibas kegeluhenna (ay. 13-14). Pengajaren kerna kegeluhen selaku anak DIbata e jadi alat pengajaren ibas kegeluhen enda si teridah ibas kegeluhen si mediate nandangi kalak sideban subuk ibas ngajuk bagepe mandang kalak, seh maka sie kerina teridah kemulian Dibata ibas nggeluh sikeleng-kelengen si jadi teladan sada ras sidebanna, sierbahanca la lit kalak simapas man pengajaren e bagepe keberadanta selaku kalak sierkiniteken. (bd. Ay.15).

Arah bahan enda banci siidah maka selaku kalak sierkiniteken maka identitas e melekat

3/5


ibas kita. Identitas kalak Kristen labo man buninken tapi perlu icidahken alu kegeluhen uga kin arusna kita selaku kalak sierkiniteken e. Guna sie perlu sirenungken maka : 1. Identitas kalak Kristen silit ibas kita eme pemere Dibata si arus sijaga ibas kegeluhenta, ertina tetap arus lit perjuangen guna mpertahankensa. 2. Identitas e arus sicidahken arah perbahanen geluhta guna banci itandai kalak sideban ise kita. Ertina terang min penandai kalak kerna keberadanta selaku kalak si tek man Kristus. 3. Ncidahken identitas kalak Kristen ertina ncidahken kemulian Tuhan arah kegeluhenta. Jadi perlu tetap setia kutera kai pe siman alanken kemulian Tuhan arah kita arus terus teridah ibas kegeluhen enda.

Arah pengertin enda ka me secara praktis arus sicidahken sie kerina alu :

- Litna perubahen perbahanenta ibas kegeluhen enda : sindube la mehuli salih jadi mehuli, sebab si ieteh kalak maka Kristus, pengajarenNa e ncidahken simehuli. Ula min erkiteken perbahanen kalak kristen justru tercurna gelar Dibata.

- Perdalanen nggeluh si ngasup ngkuasai diri, bujur nggeluh. Ertina identitasta e arus teridah gia banci jadi sekelewetta la mehuli, la bujur rsd, tapi kalak Kristen arus pang naksiken dirina selaku kalak si “berani tampil beda”.

- Nembah Dibata ibas kesetiaan ras ketutusen arus teridah arah nggeluh bersih ras lalap mesikel erbahan simehuli. Kalak Kristen arus lalap nuduhken simehuli ibas geluh enda, gia banci jadi la akap doni enda payo, tapi ingetlah, maka Dibata payo akapNa adi anak-anakNa ncidahken simehuli ibas kegeluhen enda.

Enda me bagin siarus terus silakoken selaku anak Dibata guna ncidahken ise kita selaku Kalak Kristen. Simbol-simbol labo jadi hal siutama guna ncidahken identitas, siperlu teridah eme uga iidah kalak, ernanam akap kalak kerna keberadanta selaku sikerajangen Dibata.

Pdt. Alexander. S. S.Th

4/5


GBKP Bekasi – Galaxy

081384498009/087777100076 /[email protected]

5/5

2:11 Sabap enggo ipetangkas Dibata lias atena guna keselamaten kerina manusia

Recommend Documents