CV DE WESPELLE. Brokkelze

CV DE WESPELLE Brokkelze

Zievende joargank jannuaar 2011

Vier danke alle adverteerders en sponsore en wunsje gidderinne ee good en gezonk 2011

********************************************

Ouwer weade Dreij oudjes kome noa e aantal joare werrum ins beije: “Wat dees doe sinds te mit pensioen bis?” D’r ierste: “Ich fotografeer”. D’r twiede: “Ich wirk get in d’r gaat”. D’r dreijde: “Ich don opsporingswerk”. “Oh joa!, wat dees te dan?” “Giddere daag zeuk ich mieng sluetele, mienne wandelstek, mienne bril, mieng valsje teng, mie huurapparaat....!!!

2

Prinse en Wespeldrager van 2010 Vergulde Wespel

Mia Wandler

Prins Rico 1

Jeugdprins Jisk 1

3

4

Vuurwoad van d’r vuurzitter/president Leef Wespelle va Brokkelze. Zoe kort noa neujoar sjtond vier alwer an d’r vuuroavend van ’t begin van de activiteite van ’t carnavalsseizoen. Vier gont huuj d’r opvolger van ozze prins Rico der Ierste oetrope. Mar dat dunt vier wie ier van oz gewend zit pas an ’t eng van ee geweldig programma mit diz kier och werrum veul inbreng oet de eege geledere. Hant vier dit joar inne prins, of hant vier missjien an ’t eng van de zietzung vuur de twiede kier in oz bestoa ing prinses? Vanoavend zalle vier ’t wete. Vurrig joar han ich inne oproop gedoa om neuj lede te werve. Dea oproop hat succes gehad. Enkele manne hant doa aa gehuur gegeave en vier hant veer neuj lede in d’r verein welkom maage hete. En missjien hat ier ’t och al gehoed: vanaaf de joarvergadering va 2011 zint och dames in der verein welkom. D’r zint al ee paar dames die zich op vuurhank hant opgegeave. Wea interesse hat kan zich vuur ’t lidmaatsjap opgeave beij ’t bestuur of de lede. Me wead mit ope erm ontvange. Och diz joar hant de Wespelle natuurlik wer ee uvervol programma mit onger angere oz proclamatie en volgende weak hult ozze neuje heerser of heerseres de receptie die ich van hatze beij uuch wil abevele. Vier zint och werrum present op d’r oavend van d’r voetbalkloep, en op Vetdonnestig zalle de Koetschegruuskes op ing gepaste maneer durch oz ontvange weade. Alle activteite op te neume is op diz plaatsj get veul van ’t gowwe, mar ich wil zieker nog de carnavalsdaag neume. Dat is toch elk joar werrum ’t hoegtepunt van de Brokkelzer carnavalsviering. Betste Brokkelzer Wespelle, ich denk dat vier oz de komende weake regelmatig zalle tegekome en wunjs uuch vanaaf diz plaatsj ing lange en sjunne carnaval tow. Vuurzitter/President André Dadziak 5

6

D’r direktuur van ee groet bedrief wead binnekort 60 joar. Hea loot d’r boekhouder beij zich op kantoer kome en zaat: “Ich wil mienne verjoardig zoe viere dat ‘t opvilt, ’t maag nit veul koste en ’t personeel mot sjpass dra han.” Zeet d’r boekhouder: “Tja, ich zow zaage: hangt uuch op. Dat vilt op, ’t kost nieks en ’t personeel zal doa zieker sjpas an han.” Twie vrundinne zint op weg noa e feestje. Zeet ing opins gans verbaasd: “Zaag mich ins, doe has ja gaar nieks mie a onger die kleed.”!!! Zeet die anger: “Wat zowste denke, doe stops dich toch och ging watte in de oere wenste noa e concert gees.” Adam en Eva ligge op inne stralende daag in ’t graas van ’t paradies. Vruugt ’t Eva: “Adam, hulste va mich?” D’r Adam drient zich um en zeet: “Van wem angejs?”

7

8

Vrouwluu in dr verein ’t Is e zoe wiet. De Wespelle hant in hun ledevergadering besloate dat och vrouwluu in d’r verein kenne weade opgenome. Doa is lang uver noagedaat. En dat hat gans get veut in de ead gehad. D’r inne how d’r gee probleem mit en d’r angere zoog ’t gaar nit zitte. Mar ’t bestuur hat alle twiefel beij de lede kenne voetnumme en uiteindelik is besloate dat mit ingank van ’t nuj seizoen dames mit kenne doe in ozze verain. Vanaaf de komende joarvergadering kanne de vrouwe deel oetmake van ozze verein. Mar kanne ze dan och meteen veul eise sjtelle? Nee… dat nit, maar ze weade zieker vuur vol aagenoame. Bestuurstake kanne durch heun vervuld weade, en ze hant dezelfde rechte en plichte wie de mansluu in d’r verein. Mar eise dat vuur e bepaald joar ing prinses motte oetrope, of lid weade van d’r Elveroad, dat geet (vuurleupig?) nog nit.

Wat de toekoms oz geet brenge dat wete vier nog nit mar mit de opestelling van ozze kloep vuur ’t vrouwelikke geslag denke vuur de toekomst mit vertrowwe tegemoet te kenne treëne. Vier hope dan och dat veul dames tot oz geledere zalle towtrene en dat vuur same d’r verein tot in lengte va joare kanne lotte bestoa. S. Tinkkies

9

10

Ozze verein hult de vergaderinge ummer in ’t plat. Dat is och logisch want ’t is bewieze dat vuur dan flotter veedig zint mit vergadere. ’t Limburgs plat is de kôtste taal van oz land en dus och ’t efficieënste. Kiek mar ins noa ongerstoonde umsjrievingen.

Dit behoort tot de mogelijkheden. Hieromtrent kunnen wij u geen enkele zekerheid bieden. Zou u dat eens willen herhalen? Zulks ben ik geenszins van plan. Ligt dat in de lijn der verwachtingen? Hiermee denk ik geen problemen te ondervinden. Dit wordt door mij als bijzonder spijtig ervaren. Hetgeen u mij vertelt, verbaast mij ten zeerste. Deze informatie is geheel nieuw voor mij. Ligt dat binnen het kader van uw bevoegdheden? Ik heb hierover een enigszins afwijkende mening. Het leven van een Limburger gaat niet over rozen. Door omstandigheden is het project niet op tijd gereed.

Dat kèn Doe wits mar nooit Wat? Ich dag van nit Zow ut? Ging mujte Dat is jammer Wat zeeste mich noe? Doa weet ich nieks va Maag dat waal? Nit woar ’t Is mich get Woa is nieks

Conclusie: mit ’t Limburgs en zieker och ‘t Brokkelzer plat als standaardtaal sind de vergaderinge 80% kotter, en kan d’r ieëder in de wiedsjaf a gen tieëk nogekaat weade!

11

12

Pratsch Durchee Wie in 2006 de sjul is aafgebrankt bestong d’r ing groete kans dat de kingercarnaval vuur Brokkelze verlore zow goa. Ging sjul mie, betekende och ging kingercarnaval mie, want d’r woar doe och ginne ouderraad mie. De Wespelle hant doe besloate ’t kingercarnaval onger de vlugele van d’r verein te lotte plaatsvinge.’t Diana DadziakBeckers hat vanaaf ’t begin de organisatie op zich genoame. Wie is Pratsch Durchee ontstange? In 2006 wie de sjul is aafgebrankt koam d’r carnaval um d’r hook kiekke en ich daat: owie noen hant vier nieks mie. Ich han doe d’r carnavalsverein gevroagd of ze mich woolle helpe beij ’t organisere van de kingercarnaval. Noa get twiefel hant ze d’r mit igestemd en beslote ins te kiekke wie dat geet. ’t Loog egelik beij de oudervereniging die dat vuurhin ummer ing weak vuur de carnaval organiseerde. Mar wie dat doe ophoet daat ich: Ich mot mich toch ins mit de kingercarnaval goa bemeuje. Vier sind doe meteen tussje Krismes en Neujoar begonne. D’r verein sjtimmet in en ich bin kinger goa vroage um mit te doe. Va doa oet is Pratsch Durchee ontstange. Begonne sind vuur mit inne maan of tien. Dat woare kinger die in Brokkelze ummer al mit donge en die han ich gevroagd. Die kinger zote doe nit mie in Brokkelze op sjul. Beij mich heem in hoes woed geoefend. De meubele an de kant, meubele in d’r opslaag, mienne maan d’r André hat mich duks verwunjst. Dat hant vuur dreij joar lank bei mich heem gedoa, mar in 2009 woed d’r groep ezoe groeët dat vuur noa ing anger ruimte moete oetkiekke. Dat woed de ruimte boave de kleedlokale van d’r voetbalkloep.

13

14

D’r naam Pratsch Durchee is ins mit inne gekke slaag gevalle. Vuur dont joa alles och durchee; get vuur de groete kinger, vuur de kling kinger en zoe is ’t inne groeëte groep gewoede. Dit joar sind vier – wirkjlich woar - mit 31 poete in d’r leeftied va 4 tot 16 joar. ‘t Programma krien ich beijee durch ’t ganse joar oge en oere ope te hoate, alles waste zies, loestere noa wat de kinger dich vertelle, wat leaft momenteel en doa op dinger verzinnen. De kinger drage zelf och van alles a wat ze leuk vinge. Dat geet van K3 tot an d’r Michael Jackson. Ich denk dat doa och ee bietje de kracht likt van Pratsch Durchee, ’t is van de kinger, vuur de kinger, durch de kinger en dorum pakt zich dat och beijee. De groeëte zörge vuur de klinge, en de klingere kiekke noa de groeëte op en gont beij deun op d’r sjoet zitte, die loestere noa deun, dat geet eins-A. Dat is prachtig um te zieë.Vier oefene twie kier in de weak, op d’r goonsdig en inne daag in ’t weekend. Van die proof probere vuur giddesj kier ee fes te make want vuur hant ummer get te drinke en get lekkesj. De groete tuute mit sjpek sind nit a te sjlepe en dan tussjedurch nog ins get extra’s zoe wie chippies of get cake. ’t Sjunste is ’t towwirke noa de generale op d’r donnestig vuur de carnaval. Begonne wead um veer oer in D’r Eck wo vier – zieker nit onbelangrijk – van d’r Ben en ’t Finy gratis gebroek maage make van d’r zaal. ’t Ganse program wead dan aafgespild en dat lukt meestal 15

16

vuur ginne meter, dat geet nuge van de tien kier bar slecht. Donoa gont vier teruuk noa oz ‘honk’ en doa weade dan frite gegeate. Um ing oer of zieve sind de kinger dan werrum heem. Dat frite eate is ’t hoegtepunt van dea daag. Donoa op noa d’r samstig. Alleneuj sind ze dan bloodverveus, mar oeteindelik lupt dea daag alles wie ’t zie mot. Inmiddels mage vier oz d’r topper van de kingercarnaval neume denk ich. Dit joar is vuur oz e jubileumjoar. Vier viere ’t ierste lustrum en dat is toch speciaal en dat zal nit zonger extra aandacht an Pratsch Durchee vuurbei goa en op d’r daag zelf zalle de kinger och ing verrassing kriege. Inmiddels hant vier bewieëze dat vier in Brokkelze get op de bee kenne stelle en och vuur d’r carnavalsverein is ’t ing aanwinst. Vuur hant ee good programma dat leuk in ee zit en ’t is e fes vuur de kinger en natuurlik och vuur de ouwejs, de oma’s en opa’s en alle angere aanwezige. Ich durf bow te zage dat ’t nurgens zoe geet wie beij oz. Ich kom zelf och oet e carnavalsgezin en vong ’t durchgoa van ’t jeugdcarnaval erg belangriek vuur oz dörp, want went de jeugd nit mie zow kome umdat ze op anger sjloeële zitte en op anger plaatsje carnaval gont viere dan hant vier groete och nieks mie. Dat is gelukkig nit gebuurd en noen is ’t zelfs zoe dat kinger va boeteaaf mit heun ouwesj heij in Brokkelze carnaval kome viere. Ich bin ezoe waanzinnig sjtols op die poete wen ich die op de buun zien stoa. Doa ken inne verjoardig, krismes, sinterkloas, poassje en wat git ’t nog alleneuj, nit tege op. Ich hoop dat ich dit nog lang kan en maag doe en op z’n minst de elf joar kan volmake. Ich gon d’r vanoet dat naderhand de kinger die vanaaf ’t begin d’r beij sind went ze get ouwer sind ’t gont uverneme. Wie ze noen zant zalle die dat doe. Mar lotte vuur iers mar ins de elf joar vol make. En wat mich betruft: ’t Sjunste op de welt is de carnaval in Brokkelze mit al die kinger same en dat zow ich vuur gee good wille misse. ALAAF!!! C. Amembert 17

18

11 vroage an aftrênend prins Rico I Wat daatste wieste gevroagd woeds um prins te weade? Ich how dit nit verwacht. How waal ins ’t vermoede gehad dat ze mich woole vroage, mar han doa nieks mie van gehoed en opins stonge ze doe beij mich an de duur. Ich han mich mar effe hove te bedenke en han binne twie stond al towgezaat. Woarste zenuwachtig wieste op moes koame? Joa, zieker ich woar nit gewend um vuur zoenne groete zaal te stoa, mar wie ich doa eemoal stong, doe woar ’t vlot uver. Ich how heem zitte wade op ee telefoontje van d’r secretaris en dea bellet mich e paar kier um te zage dat ’t program get woar oetgelope en ich nog nit hoofde te koame. Dat is nit good vuur de nerve. Wie haste de prinseproclamatie ervare? Als erg sjun. De aandacht die ste kries va gidderinne. Doe bis toch d’r maan woa ’t um drient. Alling van ’t programma han ich nieks mit gekriege, dat mot ich dit joar mar inhoale. Och de prinsereceptie woar ing geweldige gebuurtenis. Gidderinne dea kunt, kunt vuur dich en doe has dan och nit mie die spanning. Is alles oetgekoame wat in dieng punte geproclameerd is? Wat doa alleneuj instong…, joa,.. eh… eh…, dat weet ich egelik nit mie… Dat mot ich nog mar ins noakiekke. Wat woar ‘t sjunste watste has mitgemakt? Dat is erg moeilik um doa get oet te keze. ’t Woar egelik alles eve leuk. Ich bin doa al ieder nog gevroagd woede, mar han doa gee antwoord op. Alles wor sjun. Wen ich echt get zow motte neume dan zal ich gans lang motte noadenke. Wat in ieder geval ee hoegtepunt woor, dat wor d’r optocht. 19

20

Wat vongste van d’r optocht? Geweldig. Och al loog d’r sneij, dat how waal get, want dat is nit gidder joar zoe mit d’r optocht. Tijdens de carnaval en in d’r optocht biste d’r persoen woa gidderinne tege aa kiekt. Natuurlik wead d’r och noa anger luu gekieke, mar toch ’t meeste noa d’r prins. En van de carnaval zelf? Hielemoal geweldig, ich how ierder nog nooit zoe de carnaval gevierd wie vurig joar. Meestal ee paar daag en dan howste ’t gehad. Mar als prins de carnaval mitmake, dat is hongenddoezend kier angesj. Dat how ich vuur gee good wille misse. Woar ‘t vermoeiend en haste waal ins gedaat, woa bin ich a begonne? Nee nooit, ging seconde. Muj woar ich waal al ins, vuural wie ‘t ee bietje op ‘t eng a gong. Mar wen ich dan werrum ee stundje in d’r zaal in ’t café of urgens angesj woar, dan how ich dat geveul nit mie. Vingste ‘t jammer dat ‘t noen bow vuurbeij is? Van de ing kank waal, maar ich ving och dat inne angere de kans mot kriege. En wenste ’t vuur ing twiede kier zows doe dan is ’t speciale och weg. Gidderinne mot de kans kriege um prins te weade. Mar wen ich teruukkiek dan vong ich ’t allemoal geweldig um mit te mage make. Wenste koes keze, zowste ‘t dan werrum doe? Die keus is d’r natuurlik nit mar ich zow ‘t’meteen werrum doe, zonger twiefel. Haste nog inne gowwe road vuur dienne opvolger? Ich han mar inne gowwe road: Geneet d’r va, doe bis mar ing kier prins en dat zalste nooit mie vergeate. Ich in elk geval nit. ’t Is e zoeng speciale ervaring en wentste daag vuur daag prins bis dan kuns te ummer mie in die rol en geeste de dinger in gen dörp toch angjes zie. En och de luu kiekke angejs tege dich a. Geneete van ’t prins zie is ’t belangriekste wat d’r is, want vuur datste ’t wits is de carnaval och al werrum vuurbeij.

21

22

Auto’s, auto’s auto’s… De wet van d’r autoweg: Went alles op dich aaf kunt, zitste op de verkierde weghelft. Beroemde letste weud: Nieks an de hand, ich han vuurrang… Ik vaar heij giddere daag, heij kom ich nooit inne tege… Mit diz remme ston ich binne ing sekond stil… ’t Geet nog waal, ’t is juus pas roed… Ich han mar inne gedronke. En ich kan ’t good verdrage… Dreij manne zitte in D’r Eck a gen tiek. “Wat is ’t ergste geluid daste dich kans bedenke?” vroagt d’r inne. ’t Gejank van inne wolf in inne duustere busj.” “Vootstappe hinger dich op inne duustere weag.” “Dat is alles nieks”, zeet d’r oudste en verstendigste. “’t Ergste um bang van te weade is d’r lange zachte fleuttoeën van inne monteur dea onger dienne auto likt.” ’t Leave is hél, de luu hant ’t moeilik. Gistere zoog ich in d’r Rinckberg inne miensj op stroat ligge. Ich gong noa ‘m tow um te helpe. “Is d’r get gebuurt, kan ich helpe?” “Nee”, zaate, nieks an de hank, ich han ing parkeersplaatsj gevonge en noen is mieng vrouw d’r auto hole… 23

24

In d’r kino D’r Jan en d’r Piet zitte in d’r kino en kiekke zich inne ouwe wildwest film aa mit d’r John Wayne in de hoofdrol. “Ich wed mit dich vuur viefentwintig euro dat dea dadelik van zie pead aafvilt,” zeet d’r Jan tege d’r Piet. “Aagenoame,”zeet d’r Piet: “Went hea drop bliet zitte win ich viefentwintig euro, en wente draaf vilt krieste viefentwintig va mich.” Noa ing minuut of tien biet d’r John Wayne inderdaad in d’r zank. D’r Piet pakt zieng buesj en wil d’r Jan viefentwintig euro geave. “Och witste wat, lot mar zitte,” zeet dea doe, “Ich mot dich ierlik zaage dat ich d’r film al ins how gezie”. “Ich och,” zeet d’r Piet doe, “Mar me verwaat toch nit dat dea keal zoe sjtom is um nog ins van dat pead aaf te flikkere”.

25

26

Welke zier belangrieke persoen is dit?  ** *** *** Ierlik.. “Sjattebout, wat vingste, zien ich nog ummer oet wie viefentwintig”? “Neeeeee…, allang nit mieë…!!! De uvereenkomst tussje inne gynekoloog en inne pizzabezörger: Ze mage alletwie dra ruke mar d’r nit a kome.

27

28

’t Mysterie van de aafgevalle Wespel opgelost… (vervolg op vurig joar) Vurig joar hant vier uuch op dizze plaatsj verteld uver ’t mysterie van de aafgevalle Wespel. Vier woste doe nit wat doamit gebuurd woar. Noen zint vier Wespelle natuurlik nit e zoe gouw vuur e look te vange en vier hant dan och ing commissie opgericht die dit gong ongerzeuke. De task-force ‘Blief van oz Wespel aaf’ bestong oet de lede C. Amembert, B. Rie, S. Tinkkies, onger leiding van opperspeurnaas W. Espel. Ze hant ee joar lank gesnuffeld, gezocht en heun oge en oere good de kost gegeave. ’t Resultaat mag d’r zie. ‘t Mysterie is opgelost. Wat woar d’r gebuurt? Op inne gowwe mörge loog de Wespel die an d’r gievel van D’r Eck behuurt te hange, opins beij ozze penningmeester in de oprit. Inne Brokkelzer jong vertellet oz dat hea ze ’s mörgens an d’r gievel van D’r Eck how zie stoa, ze how opgepakt en in de oprit how gezat. Inne angere loat oz nog wete dat hea ’s naats inne mit ing ledder how gehoed, mar dat hea daat dat ‘t d’r roetewessjer van D’r Eck woar. Och woed nog aagenome dat inne how gemint dat de Wespel van sjwoor koeper woar en dus erg veul wead zow zieë, mar dat noa ’t aafsjroeve bleek dat dat nit zoe woar. Ing anger theorie gong d’r vanoet dat de deeve gestuurd woare gewoede en op de vlucht woare geslage. De meest wilde theorieë koame an bod. Mar de task-forceWespel hat aafgelope joar good wirk verricht en is tot e verrassend resultaat gekoame. Wat is d’r wirkelik gebuurt. Tijdens het reparere van ’t terrasdook van D’r Eck in de Brukstroat koame enkele onverlaten op ’t idee um de Wespel – die heun op dat moment ee bietje in d’r weg hong – alvast aaf te pakke, want ze woste 29

30

dat de Wespelle van plan woare ’t dink mit get verf op te knappe. ’t Deerke woed voetgezat mit de bedoeling dat ’t opgehold zow weade durch iemes van de Wespelle. Noa ee paar weake how evvel nog ginne gezie dat de Wespel nit mie an d’r gievel hong? Dat braat de manne op ee idee. D’r woed e komplot gesmeed en beslote de Wespel beij d’r penningmeester in de oprit te legge, zoedat dea zich dan zow aafvroage wat domit gebuurt woar. Zoe gedaat, zoe gedoa mit als resultaat dat de Wespel ’s mörgens woed gevonge. De kommissie is noa zier deepgravend speurwirk och hinger de richtige identiteit van de daders gekoame. Ondanks dat ze zich aliasname howwe aagemete wete vier noen toch wea achter dizze crime zit. Hun name sind bekend en ze zalle zich binnenkort motte verantwoorde vuur hunne coup. ’t Betruft d’r Bas Rhonsen, Stan Tuinje en Dr. Ties v. Blanen. Vuur de Wespelle is heimit ’t mysterie aafgesloate, mar de batterave kanne d’r zieker van zie dat ze hun stroaf nit zalle ontlope. Went de tied riep is zalle vier ze mit pek en sjwafel insjmiere en boete an inne sjandpoal te kiek zette. Gidderinne dea d’r zin in hat kan dan mit tomate of anger greunte noa heun werpe. D’r precieze datum en tied kriet uur nog te hure went ’t zoewied is. W. Espel

31

32

Prinseproclamatie 2010

33

34

Wespelvaan werrum te kriege Ze zint d’r werrum, de Wespelvane. Vurig joar hant vier die aagesjaft mit de bedoeling oz dörp doamit feestelik a te kleije. En dat is gelukt. Veul luu hant al ing vaan gekocht en hange die in de carnavalstied an ‘t hoes. Sommige zelfs mierdere stuks. Dat ziet erg good oet. Oz dörp kriet doamit e gans anger azieë. Haste nog ging vaan en wilste ing han, dan kanste die bestelle beij ozze secretaris d’r Jeffrey Demas. Ze koste € 17,50. (en doa verdene vier nieks op).

35

36

WIETZE Noadat d’r dokter d’r patient good ongerzocht hat zeette: “Dus vier hant oz good begrieëpe. Ginne alcohol mie, ging vrouwluu, ging vreetpartije, ginne chocolaat en angere zeute kroam, ging lang rese make en zieker ’t piepe lotte. Mar vuural nog ee dink: ee bietje mie sjpass an ’t leave.” D’r Joep kunt D’r Eck binne mit ing ent op d’r erm. D’r Ben kiekt verrast op en zeet. “Wat kunste heij doe mit dat verke?” “Wat verke, zieste nit dat dat ing ent is,” zeet d’r Joep. “Ho, ho,” zeet d’r Ben, ich han ’t och nit tege dich, ich kal tege die ent”.

37

Onze Kunst- en Kunsthandwerkermarkten in 2011 5/6, 12/13, 19/20, 26/27 maart: Euregionale Indoor Kunst und Kunsthandwerkermarkt, Monschau (D) 3 april, 1 mei: Kunst- en Kunsthandwerkermarkt, Geleen (NL) 7 mei: Kunstmarkt op Plein 1992, Maastricht (NL) 5 juni: Kunst- en Kunsthandwerkermarkt, Valkenburg (NL) 5 juni: Kunst- en Kunsthandwerkermarkt, Geleen (NL) 12/13 juni Kunsthandwerkermarkt, Centrum van Monschau (D) 19 juni: Kunst- en Kunsthandwerkermarkt, Meerssen (NL) 3 juli: Kunst- en Kunsthandwerkermarkt, Geleen (NL) 9/10 juli: Kunst- en Kunsthandwerkermarkt, Echternach (Lux) 17 juli Kunst- en Kunsthandwerkermarkt, Bad Münstereifel (D) 23 juli: Kunst- en Kunsthandwerkermarkt, Heerlen (NL) 24 juli: Kunst- en Kunsthandwerkermarkt, Roermond (NL) 7 augustus: Kunst- en Kunsthandwerkermarkt, Geleen (NL) 13 augustus: Kunstmarkt op Plein 1992, Maastricht (NL) 4 september: Kunst- en Kunsthandwerkermarkt, Geleen (NL) 2 oktober: Kunst- en Kunsthandwerkermarkt, Geleen (NL)

Voor meer info kunt u ook op www.jokoproducties.nl terecht.

38

D’r penningmeester Ozze penningmeester d’r Ger Miltenburg hat noa ruim 22 joar besjlote um de kas uver te drage an inne opvolger. Mar vuur ’t zoewied is vertelt hea nog get uver zieng ervaringe in al die joare. D’r Frens Jongen, d’r toenmalige vuurzitter, had mich in d’r verein geholt. Dea how doe al de bedoeling mich penningmeester te make mar dat woos ich natuurlik nit. Ich han hem dat later waal ins vuur de veut geworpe: “Doe has mich alling mar geholt um datste inne penningmeester nudig hows!” Hea zaat doa op: “Dat han ich vuur d’r verein gedoa, ich han doe an de toekomst gedaat”. De oetnudiging vuur de ierste vergadering han ich nog. Op d’r agenda van die vergadering stong dat ich lid zow weade. D’r woed doe gestimd, ich woed aagenoame en mocht meteen noa binne kome. Beij de Droevebal die vuur doe organiseerde han ich als lid de ierste kier mitgeholpe. Dat wor mienne vuurdoop. Dat ich al gauw beij ’t bestuur zow kome woar egelik gaar nit de bedoeling. Ich daat ich wead geweun lid en bekiek ’t mich ins, mar vuur dat ich ’t woz woar ich och bestuurslid. Wen ich dat van te vure how gewete dan how ich ’t denk ich nit gedoa. Wen ich diz joar op de joarvergadering aftreen dan bin ich bow 24 joar penningmeester gewea. Vuur dat ich ierste penningmeester woed bin ich nog twie joar twiede penningmeester gewea. D’r Joep Nievelstein woar doe ierste penningmeester. D’r Frens hat mich doe gevroagd of ich d’r penningmeester wool helpe. Doa how ich waal zin in. Op de joarvergadering die gehoade woed beij d’r Leo en ‘t Elly Fröls op de kegelbaan kroog ich te hure dat ich als bestuurslid woar aagesteld. D’r Frens how dat dus good gespilt. Wie d’r Jos Mennis prins woar han ich direct noa de carnaval ’t penningmeestersjap van d’r Joep uvergenoame.

39

40

Ich wool mich nog bedenke mar d’r Sjeng Theissen zaat dat went ich ’t zow doe, hea dan twiede penningmeester zow weade en dat hat mich oeteindelik uver de strieëp getrokke. D’r Jos Mennis woar ozze jubileumprins 3x11 joar. D’r Jos hat in zie regeringsjoar ingeveurd dat de prinsereceptie ing weak noa ’t aaftrene van d’r neuje heerser woed gehoade. Tot die tied woed de receptie ummer d’r daag noa de prinseproclamatie gehoade, mar dan how inne prins ging kans um de luu oet te nudige. Zelf hat hea doa gee profiet van gehad, want ’t is pas ’t joar donoa ingegange en tot op d’r daag va huuj dont vier ’t zoe nog ummer. Dat is ee groet succes gewoede. De enveloppe van de receptie woede vreuger beij d’r penningmeester aafgegeave, die woare dus vuur d’r verein. Dat han ich als penningmeester och verenderd. De opbrengst van de receptie is van doe aaf aa ummer vuur d’r prins gewea. Waal betaalt d’r prins nog ee gedeelte van de koste van de receptie, mar dat is nit veul. Achteraaf gezie is de tied dat ich penningmeester bin vlot vuurbeij gegange. Dat kunt och umdat ich ging downs gehad han. Mieng sjunste ervaring woar dat ich noa ee joar de ierste kier de kas how opgemakt en op de joarvergadering al ee behuurlik saldo koes vermelde. Mienne vuurganger kiekket doa behuurlik va op en keek get sip, mar ich han meteen d’r beij gezaat dat dat natuurlik nit an mich loog mar an d’r verein dea ’t dat joar good gedoa how. Dat ’t beter gong koam och durch de activiteite die vuur gonge organisere. Ich han nog ee aantal joare de Droevebal mit georganiseerd, totdat doa de klad in koam, donoa de Boerebroeloft en ’t Bayrisch Beerfes. Die evenemente brachte ummer get geld in de kas. Och sind vuur ing kier of veer op rees gewea mit d’r verein. Dat woare dan weekendtrips noa Bitburg, Münsterland, Olpe en in 2005 sind vuur nog noa Einruhr in de Eifel gewea. In al die joare bin ich nooit bang gewea wen ich mit ’t geld uver stroat moes. In ’t begin how ich d’r Sjeng Theissen beij mich en dan hoofste nit bang te zie, want wea d’r Sjeng wilt aapakke dea bedenkt zich nog waal ing kier. Och d’r Jo Demas (d’r twiede penningmeester) en d’r Michiel Heunen hant mich ummer good geholpe. Mar d’r penningmeester is en bliet toch ummer vuur de kas de zörg han, och went ich waal ins get mie gedronke how, dan gold de ierste zörg de kas. 41

42

De kascontrole han ich och meteen ingeveurd. Controle woar d’r vreuger nit, mar ich han d’r op gestange dat dat moes, angesj woar ich ginne penningmeester gewoede. Gidder joar is de kas gecontroleerd en ’t woar ummer oké. Meteen ’t ierste joar dat ich de kas beheerde kroog ich al controle van de belastingdeenst. Gelukkig how ich och ummer gowwe hulp van d’r Jo Smeets dea als financieel deskundige bereid woar mich ummer beij te stoa. In de loop van de joare is d’r och nogal get verendert, Buma, GAK, loonadministratie, contracten mit de artieste, de betalinge an die luu, ’t contractere van al die luu, ’t in elkaar driene van de Prinseproclamatie en nog mie van die zake, alleneuj take woa d’r penningmeester beij betrokke woar of nog is. Ich regel och nog ummer de taxi’s went vuur mit d’r Elveroad urgens hin gont, ’t wirkschema kiek ich mich aa um te wete vuur wieveul luu d’r bruudjes motte zie – die weade vedig gemakt durch mieng vrouw ’t Leonne, duks och mit hulp van ’t Mia Jongen. D’r penningverkoop en noa afloop aafrekene sind och take van d’r penningmeester. Veul steun han ich och al e aantal joare van d’r Jo Demas, ozze twiede penningmeester, same mit hem regel ich de penninge, d’r aasjaf van de prinsemedaljes, prinsemutsj, de mutsje vuur de Riddere, vuur regele d’r carnavalswaan vuur d’r optocht en motte dovuur duks op weag. Noa mie aaftrene als penningmeester wil ich nog ee joar of twie als twiede penningmeester blieve fungere went dat meugelik is, zoedat ich mienne opvolger kan inwirke. Want ich weet wie ’t is, wie ich a troan how ich van ginne hulp, ich han mich alles zelf motte oetzeuke. Gelukkig koed ich ummer d’r Jo Smeets belle went ich d’r ing kier nit oetkoam. Same woed dan ummer alles opgelost. Huujtendaags is ’t allemaol wat mekkelikker, doe vuls e computerprogram in en d’r computer rekent alles vuur dich oet. De boekhouding sjteet op d’r pc, de belasting geet digitaal. Vreuger woar dat allemaal handwerk. Mienne groetste klus woar giddes joar ’t make van ‘t financieel joarverslaag. Dat woar ummer spannend.

43

44

De letste 11 joar va mie werk woar ich als internationaal chauffer ongerweags mit d’r vrachtwaan en woar de ganse weak voet. De administratie han ich toen duks ’s avonds in d’r auto geoda. Och ’t sjrieve van ’t joarverslaag. D’r ‘dreijde penningmeester’ noam toen de honneurs woar. Dat woar mieng vrouw ’t Leonne dat d’r vuur zörget dat went ich nit heem woar d’r toch geld woar vuur allerhand zake. Nerve han ich ins gehad wie ich durch de belastingdeenst mieng twiede controle zow kriege. Die woar geplaand op d’r vriedig noa carnaval in 2007. Ich han mieng vrouw doe lotte opbelle mit de mededeling dat ich in Frankriek zoot en de ganse weak nit heem zow zie. Ze hant dat doe versjove en de controle hat doe plaatsgevonge op 3 september van dat joar en dat woar d’r ierste daag va mie prepensioen. Oz lid d’r Michiel Heunen hat e prima programma ontworpe um de bruto- en netto loene van de artieste te berekene en dat wirkt geweldig. Vreuger rekende ich mich doa e ongeluk a. Vier hant mar ing eenvoudige boekhouding, mar toch mos te ee bietje rekene kenne um ’t alleneuj beij te kenne hoade. Vuur mienne opvolger han ich inne tip: mit alletwie de bee op de gronk blieve stoa, nit mie oetgeave dan ste has, op de kas zitte wie d’r bok op de haverkist, dat han ich och ummer gedoa. Ooit kunt och ins ing slechte tied en dan moste toch geld in kas han. Gelukkig hant vier ummer giddes joar get uvergehoade, mar dat kunt och durch dat vuur good kalkulere en ummer zelf de ege boks hant opgehoade. Vuur hant altied spek op de ribbe gehoade. Tot slot wil ich nog zaage: Ich han ’t ummer mit plezeer en mit hatz en ziel gedoa. Ich wunsj d’r verein dat hea nog lang zal bestoa en dat vuur heij an de Worm nog veul sjpas en plezeer magge han en dat ’t d’r verein financieel good vuur d’r wink mag goa. B. Rie 45

Kingercarnaval 2010

(alle carnavalsfoto’s gemakt durch Jo Logister)

46

Hoebel en Knoebel, neuj lede van de Wespelle In d’r zoemer van 2009 woede op de Wormbruk durg afgevaardigde van de gemintes Landgraaf en Übach-palenberg twie bronze sjildpadde mit enig feestelik gedeuns onthuld. Donoa stonge die dere doa mar te stoa en moeste oppasse dat d’r nit al te veul gemotoriseerd verkier uver de bruk gong. Dat woar oz als carnavalsverein inne doorn in ’t oog en nit alling oz, mar och inne inwoener van oz dörp, d’r Jean Paulssen. Hea opperde ‘t idee de bieëster inne naam te geave en hea how zelfs al name in gedanke vuur de twie brugwachters: ‘Hoebel’ en ‘Knoebel’. Ozze verein hat die suggestie geer uvergenoame. Zodoende woed ’t plan opgevat um die jonge te adoptere en mit enig ceremonieel te deupe. Op Vetdonnestig van ’t vurig joar woar ’t dan zowiet. Noadat de Wespelle de Koetschegruuskes in D’r Eck howwe ontvange en heun werrum op weg noa de Grunstroat howwe gesjikt, trok ’t ganse gezelsjap noa de Wormbruk. ’ t Woar koud en glad mar dat koes de sjpass nit bederve. Op de bruk woed ing korte doopplechtigheed gehoade. President André Dadziak doog nog ins oet de verf wie de biester in juli 2009 op de Wormbruk teread woare gekoame. Dat woar in ’t kader van ee kunstproject dat de samewirking tussje Landgraaf en Übach-Palenberg moet oetdrukke. D’r kapeloan Nico Ringens gong aan ’t wirk en hoalet inne emmer deupwater oet de Worm. Vuur d’r duutsje sjildpad howwe vier oz lid Günter Vieten aagewieze um hem mit d’r kwast te deupe en hem d’r naam Knoebel te geave. Vuur d’r hollensje pad – dea d’r naam Hoebel kroog – woar d’r Jo Beismann als petenonk gevroagd.

47

Optocht 2010

48

Flink get spreuke en gowwe road woed de sjildpadde towgesjwaajd durch die twie here. Noa deez ceremonie sind de twie Wormwechtere opgenoame in de Brokkelzer gemeensjap. Bei ee doopsel huurt och inne deupkaffe mit besjuut en muuskes. Dead woed noa afloop in ’t café van D’r Eck geserveerd en aafgesloate mit de nudige heildronke op oz twie neuj burgers. Tot nog tow hant die alles good uverstange. Aaf en tow wilt nog waal ins inne mit geweld uver heun hin vaare of klimt zelfs middedrop mit zienne waan, mar meestal hoeve ze alling mar tow te lotte dat ze als foto-object deene vuur jonk en oad. E.M. Mentaler

49

50

51

52

53

Dutch Beveiliging Het oog voor veiligheid Maak NU vrijblijvend een afspraak en we bekijken samen wat de mogelijkheden zijn om Uw huis/garage/tuinhuis enz. enz. zo optimaal mogelijk te beveiligen.

MAAK HET INDRINGERS ZO LASTIG MOGELIJK U WILT TOCH NIET VOOR VERRASSINGEN KOMEN TE STAAN? Bel NU: 045-5333318 of 065750169 Mailen mag ook: [email protected]

Bedrijfsgegevens:

Dutch Beveiliging Rimburgerweg 307 6374 LC Landgraaf Kvknr:14104289

54

55

© 2011 HBe

56