TATA IBADAH MINGGU WANITA GKPS TAHUN 2017
Tema: “Ibohali Manghobaskon Horja na Madear.” (2 Timoteus 3: 17) Subtema: “Ajari ma Kuria in gabe Sipangidangi Ibagas Hapentaron, Haporsayaon ampa Bulus ni Uhur ase Lambin Torsa Kuria in, Mampangkorhon Hadoharon pakon Hadearon i tongah-tongah ni Gareja, Masyarakat ampa Negara (2 Petr. 1:5; Ef. 4: 13-15)
I. PRAELUDIUM
Saat teduh pribadi Prosessi Petugas ibadah masuk hu ruang ibadah pakon sahalak ASM, Pemuda, Bapa, Wanita).
II. KEBAKTIAN
1. Pengantar Ibadah (Sahalak Anak Sikolah Minggu, Pemuda, Bapa pakon Wanita maju hu lobei pakon Paragenda)
ASM.
Malas tumang do uhurhu bani haganupan na dob hujalohon humbani inangku. Girah sogod domma puho ia laho pasirsirhon haporluanku, lang ongga marnasalosei horjani humbani sogod das hubani golap ni ari, hubotoh do halojaonmu ai inang. Age sonai seng ongga lupa ham martonggo bai ganup borngin anjaha isobut ham do tong goranku. Seng tarhira banggal ni holongmu in inang pabanggalhon au. Tarima kasihma inang bani holongmu in. Pemuda. Inang do na pabanggal-banggalhon au humbani haetekonku das hubani sonari. Holong ni inang bani niombahni lang boi ibandingkon pakon atap aha pe na adong i dunia on. Totap do ibere ham semangat bangku anjaha totap do ihasomani ham ahu ibagas hasunsahanku tarlobih sanggah panorang tartangis au. Tarsirom do ham anggo gabe jolma na marhasil ahu. Tarima kasihma inang bani holongmu in. Bapa. Malas do uhurhu sadokah rap hita bani rumah tangganta. Rap do hita mandompakkon goluh on, mansarihon goluh siganup ari ronsi pabanggalhon niombahta. Malas ni uhur sonai age pusok ni uhur rap do ibolus hita. Sabar do ham manganju au bani ganup hahuranganku. Hasomanku sayur matua ma ham inang anjaha tarima kasih ma bani holongmu in. Wanita. Sadarion aima Minggu Wanita sa GKPS sekaligus homa Hari Perempuan Internasional. Domma 59 tahun hajongjonganni Seksi Wanita GKPS. Marmalas ni uhur tumang ma tongon hita inang na pinilih ni Tuhanta laho mangidangi i tongah-tongah ni kuria, keluarga sonai age masyarakat. Ase gabe sipangidangi hita ibagas hapentaron, haporsayaon ampa bulus ni uhur. Selamat Minggu Wanita GKPS ma hubanta.
(Jongjong kuria anjaha mandodingkon Haleluya No. 395: 1-2) Pasangap ma Tuhanta marhasoman arbab pakon doding.
Sombahkon ma pujian marhiteihon inggou maraloling. Dear ma riap mandoding haganupan, malas uhur rap mangolobkon. Porini adong pusok ni paruhuron, roh do Tuhan lao patorsahon.
Dodingkon doding baru, marhasoman sora na malurlur. Pamaling ma soramu, songon parmaling ni taur-taur. Dear ma riap mandoding haganupan, malas uhur rap mangolobkon. Porini adong pusok ni paruhuron, roh do Tuhan lao patorsahon.
2. Votum – Intoitus – Tonggo P. Ibagas goran ni Naibata Bapa, pakon Tuhan Jesus Kristus ampa Tonduy Napansing, Sitompa langit pakon tanoh on. Amen Hu Bamu do Jahowa hudompakkon tonduyhu. Ham Naibatangku, hu Bamu do ahu martenger ni uhur, K. Ulang lopas Ham ahu tarbador, ulang ma marsurak-surak munsuhku mangidah ahu. P. Tongon, seng anjai tarbador sagala na marnalom ni uhur Bamu, K. tapi maningon tarbador do halak pangeluk na so ingkat marhala. P. Ham Jahowa, pabotohkon Ham ma hubangku dalanMu K. ajarhon Ham ma hubangku lapangMu P. Sai togu Ham ma ahu ibagas hasintonganMu, ajari Ham ma ahu; K. ai Ham do Naibata ni hatuahonku, Ham do hupanalom ganup ari P. Sai ingat Ham ma, ale Jahowa, sagala dear ni layakMu pakon idop ni uhurMu, ai humbani nabasaia nari do in K. (mandodingkon Haleluya No. 309:1) Au sol dohor Bamu, Ham Naibata. ‘Ge pe manaron au, hu porsan ma. Mandoding do au on, mamuji Ham tongtong. Lambin dohor, Bamu dohor Bamu. P. Martonggo ma hita! Ham Tuhan Naibata paridop ni uhur hubani haganupan jolma. Pujipujian ampa tarimakasih do isombahkon hanami hu Bamu, halani panghophopMu in bennami. Gok ibagas malas ni uhur do hanami sadarion, bani na riap hanami mamestahon pesta minggu Wanita GKPS pa-59 tahunkon pakon Hari Perempuan Internasional. Urupi Ham ma hanami ase totap mandalankon pandiloonMu in bannami gabe sipangidangi i tongah-tongah ni kuria, keluarga sonai age masyarakat. Jalo Ham ma hanami marhitei AnakMu Jesus Kristus Tuhannami. Amen
3. Mandoding Haleluya No. 407: 1-2 Puji ma Jahowa Tuhan Naibata, ai marjumbalang do Goran-Ni in. Haganupan jolma sai marsombah ma, sai hagoluhkon Hata-Ni in. Holsoh haganupan mambur, tubuh ma malasni uhur. Gok bai pangarapan holong na totap, rap mangolobkon goran-Ni in. Ningon do marsombah bani Naibata, puji ma Ia pargogoh do in. Ulang marnaloja sai irikkon ma, rap mambalosi hata-Ni in. Holsoh haganupan mambur, tubuh ma malasni uhur. Gok bai pangarapan holong na totap rap mandodingkon: Haleluya!
4. Hasasapan ni Dousa P. Riap ma hita jongjong! Martonggo ma hita mansopotkon dousanta hubani Tuhan Naibata: Ham Tuhan Naibata pargogoh na so tarimbang, Roh do hanami marsombah hu lobeiMu ibagas unduk ni uhur ampa mansopotkon dousanami na banggal in. Gati do hanami lang martenger ni uhur hu Bamu anjaha gati soya panghophoponMu in ibahen hanami. Gati do homa hanami manlembang humbani hataMu anjaha buei do lang ihorjahon hanami aha na patut sihorjaonkonnami. Ham Jahowa idop ma uhurMu bannami pardousa on. K. (Mandodingkon Haleluya No. 364:1) Hubogei Tuhankin, na roh mandilo au “Marhiteihonni darohKin, goluhmu boi sonang” Sai manrogop au roh manombah Ham. Sai papansing Ham ma au, marhitei darohMu. P. Selaku halak na porsaya patut do namin hanami martangungjawab gabe saksi i tongah-tongah ni dunia on, marhitei parsahap sonai age pangabaknami i tongah-tongah ni keluarga, gareja, masyarakat ampa negara. Tapi gati rosuh nami sandiri do isuhuni hanami bani goluh siganup ari, na mambaen borit uhur ni hasoman. Bueinan do ipakei hanami panorang mamingkirhon dirinami sandiri marimbang mamingkirhon na hinarosuhkon ni uhur-Mu. Ham Jahowa idop ma uhurMu bannami pardousa on. K. (Mandodingkon Haleluya No. 364:4) Ibere Ham Tuhan, haporsayaonkin. Sai tambah ma holongMu in, pamalas uhurhin. Sai manrogop au roh manombah Ham. Sai papansing Ham ma au, marhitei darohMu.
P.
Ham Tuhan Naibata Bapanami, simada kuasa ampa na gok hasintongan. Domma ipilih janah ipapansing Ham hanami marhitei AnakMu Jesus Kristus na patalupkon hanami gabe Sipangidangi. Ibotoh hanami lang adong gogohnami anggo lang TonduyMu na marhorja laho mangurupi hanami ase gabe sipangidangi na gok ibagas hapentaron, haporsayaon ampa bulus ni uhur hanami na mangkorhon hadoharon pakon hadearon i tongah-tongah ni dunia on. Ham Jahowa idop ma uhurMu bannami pardousa on. K. (Mandodingkon Haleluya No. 364:5) Horjamu in Tuhan, dear pardalanniin. Totap ganup padanMu in, sadokah-dokahniin. Sai manrogop au roh manombah Ham. Sai papansing Ham ma au, marhitei darohMu. P. Tangar hita ma Hata ni Naibata, bagah-bagah pasal hasasapan ni dousa. “Songon sintongni manggoluh Ahu nini Jahowa, sabonar seng marosuh uhur-Hu mangidah hamateion ni parjahat, tapi ase mulak do parjahat ai manadingkon dalanni, ase manggoluh ia.” Hasangapon ma bani Naibata i babou ! P+K. Amen.
5. Mandoding “I Lobeimu Tuhan” (idodingkon 2 (dua) hali) I lobei mu Tuhan talar do haganup seng dong na lingod I lobei Mu Tuhan tangkas do haganup seng do na sungkod pangabak... panlangkah... parsahap ge parlahou lang dong pasangapkon goranMu lang dong pamalaskon uhurMu
TonduyMu ma na marsora bai uhurhon mangajari, mamodahi au paubah, paubah au Tuhan bere uhur na bayu holong Mu ma na manggoki goluhkon mangajari ganup pingkirankon paubah-paubah ham Tuhan bere uhur na bayu
6. Narasi Minggu Wanita GKPS: Pangaduan pakon Pangarapan (Ibasahon 2 (dua) halak inang) Bani haganup langkah ni goluh on Huidah janah hupingkiri buei do na masa i tanoh on Sipata gobir, mabiar laho mandompakkon ganupan in Loja janah ngayotan, tariluh, maborit parangkulaon ………….. Ai ija do ganup ujungni on?
Hutonggor hu siamun… hutonggor homa hu siambilou Hutangar hunjon… hutangar homa hunjan, hupapangkei janah hupadohor Bagei tumang na masa i tanoh on, mambaen martambah halutuon. Hinorhonni hamajuanni zaman on Buei tumang do halilian na gati mambaen hita taruyun ……………
Niombah lang be sipambalosi Pangindoan jajat na hurang bahat anjaha hurang podas Moru homa hormatni niombah anjaha lang sipartarimakasih Ija ma lang madotei atei-atei ……………
Sipata bapa pe lang tarpanriahkon Lang adong pangaduan, Ai naha ma nani haganupan on?
Roh ma au bamu Tuhan patugahkon in haganupan Dong do Ham Sipargogoh mangurupi au, Mangkasomani au bai haganup pardalanan Manogu-nogu mambaen lambin tambah haporsayaon, Gabe inang na mangidangi bani keluarga, Bani niombah, nai homa bani bapa Pataridahkon hajongjongan selaku inang Paubahkon uhur, mambere malas ni uhur Na mangarusi janah patorsahon haganupan Diatei tupa ma Bamu, Tuhan Domma marumur 59 tahun hajongjongani Seksi Wanita GKPS on Na dob matua anjaha matoras do hanami Sai lambin taridah ma pangidangionnami, tambah haporsayaon hu-Bamu Lambin marondos anjaha marhabiaran hu-Bamu, Tuhan Nai homa lambin tambah ma hamajuanni SDM na berkualitas i tongah-tongah ni gareja, keluarga sonai age masyarakat Gabe sangap ma Ham, Tuhan
Tarimakasihma Bamu Iajari Ham au, iajari Ham hanami haganupan Janah damei ma jumpahannami
Selamat Ulang Tahun pa-59 tahunkon ma hubanta inang. Tuhanta ma na mamasu-masu. 7. Mandoding Haleluya No. 497: 1-2 Holong ni Jesus manggomgom ganup kuria Na patotapkon hasadaonta in. Damei-Ni in ma manrahut paruhuranta, Idop ni uhur batar-batarta in Damei-Ni in ma manrahut paruhuranta, Idop ni uhur batar-batarta in.
Raya Bayu, Februari 2017 Satria Aman Purba/Pdt. Melena Turnip
Riap ma hita sauhur martangkap tangan, Ibagas damei na humbai Tuhan in. Marpangarapan tongtong bai horja ni Tuhan Hataridahan ni hasintongan-Nin Marpangarapan tongtong bai horja ni Tuhan Hataridahan ni hasintongan-Nin
8. Hata Haporsayaon (jongjong kuria) P. Saksihon hita ma haporsayaonta in songon na sinaksihon ni haganup halak na porsaya bani sab tanoh on. P+K. Ahu porsaya bani Naibata Bapa…. Amen 9. Acara Khusus Mambasa Tonah Mars Wanita Koor Minggu Wanita GKPS Tonggo Syafaat
10. Mandoding Haleluya No. 453: 1-3 Pitah Ham Tuhan, hatundalan na toguh. Humbai ganup paruntolon na itanoh on. Bani haganup pardalanan, pitah Ham panjaga na gogoh. Ondos ma Tuhan, hanai on nuan, ‘se torsa sadokah goluh on.
Tonduy Na Pansing, bere Ham bannami on. Sai useihon Ham bai uhurnami ‘se sintong Ase dong pargogoh manlawan, kuasa ni dunia na bajan Ondos ma Tuhan, hanai on nuan, ‘se torsa sadokah goluh on.
Bohi pe minar, megah tong halani Ham. ‘Ge gilumbang roh mandorab goluhnami on. Bani haganup parsahitan, hata-Mu do tambar na gogoh. Ondos ma Tuhan, hanai on nuan, ‘se torsa sadokah goluh on.
11. Ambilan: Psalmen 121: 1-8
12. Galangan (Agenda model A) Mandoding Diateitupa ma sombahku hu Bamu Tuhan (logu Betapa Hatiku Berterimakasih irik patumpu galangan) Diateitupa ma, sombahku hu Bamu Tuhan. Halani holong-Mu, Ham parsimada au Reff : Huboan hu bamu, daging 'pa tonduyhin na gabe galangan, parsombahan Bamu Ai lang tarbahen au, na patut hu Bamu ai pitah on Tuhan, na targalangkon au hupindo hu Bamu, sai holong ateiMu sai jalo Ham Tuhan, galanganku on sai pakei Ham ma au, gabe parugasMu sadokah goluhkon
13. Tonggo Panutup – Tonggo Galangan – Pasu-pasu (Agenda model A) III. ACARA PERAYAAN
